你係咪歧視我?

#ParentLicenses1871

我個仔喺讀書嘅時候一直受盡欺凌,自此造成無數童年陰影,亦因此而搞到無心機讀書同好驚同人相處

讀完書畢業之後,我仔完全唔敢出去搵工,連part-time都唔敢試,已經喺屋企隱蔽咗好多年,再咁落去都唔知佢嚟緊點樣可以照顧自己。雖然我知佢一直都好想走出呢個困局,但如果對佢打鬧,或者經濟封鎖,我又怕會造成反效果,就算一路有搵社工都冇用,根本完全幫唔到咩手

好啦,到佢真係諗住鼓起勇氣踏出第一步去見工嘅時候,雖然估到見工個interviewer會問佢點解咁多年唔做嘢,但無諗過個interviewer竟然兜口兜面問佢:「你係咪嗰啲隱青或者精神病患者?」甚至離譜到再兜口兜面問:「你係咪坐過監?」

其實咁樣可唔可以告間公司歧視?雖然明知講法律一定冇可能夠對方玩,但如果唔發聲嘅話只會助長呢啲歪風,只會變相造就更多受害者同無數慘劇!

前排嗰篇隱青投稿真係睇到好感觸,呢位投稿人士的而且確反映出一直無人肯講嘅深層次問題,加上案中情況可以話同我個仔幾乎雷同,亦深深覺得平機會絕對係有必要引入「無業歧視」/「年齡歧視」/「學歷歧視」條例,因為咁樣先可以保障返呢啲一直被大眾邊緣化嘅求職人士,只係完全唔明點解平機會唔肯正視下!

當然我都知道就算向平機會反映都係天方夜譚,但如果咁都唔企出嚟發聲博下嘅話就只能等死!真係唔係講玩,再咁搞法就算我未死,我個仔已經俾人迫死都未定,睇怕到時真係白頭人送黑頭人!越諗就越驚呢日會應驗!

圖片來源@Do You Hear the Hong Kong People Sing
讀者投稿@CCY

error: