地獄廚神

#ParentLicenses1867

真心,唔教真係唔好生

我囡(今年中三)上個禮拜五晚帶咗個同學上嚟屋企

我囡:「個同學想借我哋廚房整甜品俾佢男朋友」

我同老公都O咗嘴,即刻問個囡:「你幾時有男朋友無講我哋知?」

我囡重申:「唔係我嘅男朋友,係我同學整俾佢嘅男朋友」

我哋釐清之後就再問:「點解要喺我哋屋企整佢男朋友嘅甜品?」

我囡:「因為個同學呀媽唔俾佢整,同埋我哋屋企工具多啲」

我哋都冇再問呀囡,諗住女仔上嚟煮下嘢食都好閒。喺我入房沖涼瞓覺前,叮囑我囡提醒佢同學整完要執乾淨啲嘢,擺返原位就好

因為平時返工習慣咗早起,我一起身見到個廳同廚房打仗咁,真係嬲到即刻叫醒我囡:「你睇下你哋搞咗咩出嚟!?」

成地麵粉,成個食飯枱都係用完而且冇洗嘅工具,個廚房有啲櫃打開晒,而且個雪櫃冇閂埋,上格走冷氣到喺度滴水,我啲肉同三文魚一拎出嚟係有血水唔食得,屋企啲麵粉、牛奶嗰啲全部冇晒都算,真係唔係誇張,已經連拎手機出嚟影相嘅心情都冇,淨係想叫個囡個同學返嚟執返乾淨,而唔係整完拍屁股走咗去

我囡話佢交低咗我講嘅說話就入房溫習,因為我囡星期六要考IELTS,所以冇理到,我唯有嚴重警告我個囡以後唔可以再帶人上嚟整咩甜品定其他嘢食!

星期六我同老公係由朝早7點執到中午12點,個女仔重要整爛埋我哋個攪伴機,而爐頭亦全部係朱古力漬,洗到我哋差啲要講粗口!

翌日星期日,我哋收到樓下管理處電話,就話有個女仔自稱係我囡同學,問放唔放佢上嚟(因為我哋屋苑係比較嚴,除非係住客帶,如果冇住客帶會打俾住戶確認)

我問個囡:「做咩又叫同學上嚟唔講?」

我囡:「冇呀,冇叫同學上嚟」

我遂同保安講:「冇喎」

未幾,我囡即刻收到電話,原來就係個「破壞力驚人」嘅女同學又話要嚟整甜品,我同老公同呀囡講話屋企多人唔方便,個女同學竟然話俾條鎖匙佢自己入嚟

我問個囡:「你點識呢位同學?」

事情水落石出,原來係佢間學校搞個無謂計劃,要成績好、操行好嘅學生教成績較差嘅學生功課同溫習,就咁啱揀中我囡要幫手

探問下,知悉嗰個女同學大我囡三年(降級兩年)亦有家庭問題,而基於學校安排,我知我囡難做,所以我打去學校同佢反映:「該位女同學需要社工跟進而非功課輔導,如果係有心讀書同我囡喺學校一齊研究功課考試冇問題,但如果騷擾屋企就唔得囉!」

學校老師回覆話明白佢個情況,因為上年都有其他同學嘅家長投訴佢騷擾,但因為唔係學校範圍,所以佢哋唔方便介入,建議如果佢再騷擾就報警處理

如果事情發生喺你哋身上,你哋會報警定點樣處理?

讀者投稿@奇聞笑話一則

error: