#ParentLicenses1827

話說，我小朋友喺元朗區內一間唔錯嘅傳統幼稚園讀K1，我現時係全職湊小朋友。同學家長有唔少係在職媽媽，我當然理解，所以當有在職媽媽有咩問題，大部分嘅媽媽都好樂意解答

不過，「樂意」唔等於「奉旨」！事關有一位在職媽媽喺開學無幾耐，已經當咗佢個小朋友係全世界媽媽嘅小朋友咁

例子一

平時呢位媽媽嘅小朋友係搭校車，唔知點解當日係由工人姐姐接放學。呢位媽媽見其他家長影完send出嚟嘅相無佢個女份，遂即時就喺個WhatsApp群組度問：「有冇人見過我個女，如果見到可唔可以幫我個女影幾張，我驚工人姐姐接完就即刻走」

好嘞……點解你唔係直接打俾工人姐姐講聲呢？

例子二

生日會著便服，放學呢位媽媽個女唔見咗個髮夾，就喺個WhatsApp群組度問：「有冇同學仔袋埋咗佢個夾，如果有就交返出嚟」

因為佢個女好鍾意個夾，個夾對佢好重要，就要全世界幫佢編寫尋夾記。媽媽呀，既然咁重要，點解唔喺屋企，或者喺你睇住嘅時候先帶呢？

例子三

三日唔埋兩日就喺群組問：「今日有咩功課，可唔可以影俾我睇下？有定心理準備」

其實你返緊工，又唔係即刻幫到個女做，影俾你睇又點呢？同埋你可以叫工人姐姐影俾你㗎嘛

例子四

而家每朝都要做快測，之後填表。有一日，呢位媽媽就話工人姐姐唔記得填，呀女落咗校車之後，唔俾入學校，就問：「有冇家長喺學校門口幫我填返個表？」

好！學校係有少少硬頸嘅，就算你WhatsApp到張快測相俾學校，但都要家長返學校剔返個表。但講到尾，既然學校有咁嘅規定，做家長嘅都有責任。最後當然無人幫到佢啦，呢位家長就悔悔氣咁喺群組講話：「自己搭咗的士來回……」

事實係你話工人姐姐唔記得，你已經推卸咗個責任俾姐姐，但真正嘅責任真係工人姐姐求？

係，明白嘅，在職媽媽有好多嘢要兼顧，但既然兼顧唔到的話，你係咪要諗下點取捨呢？！其他家長無責任「共同」照顧你個小朋友㗎喎??‍♀️

讀者投稿@某個媽媽