#ParentLicenses2836

呢個世界真係好多霸道嘅家長

話說，我小朋友學游水嗰間游泳學校設有兩間家庭更衣室。以前我都好少用，但係隨着個仔年紀大咗，帶佢入女更衣室都有少少尷尬。雖然佢只係三、四歲，但係始終男女有別，好多女仔都會企喺更衣室外換衫，有啲媽媽真係唔太鍾意，所以我就決定轉用家庭更衣室

惟發現就算我仔提早5-10分鐘離開泳池（因為我個仔怕凍，所以通常佢會比其他同學早5分鐘以上上水，不參與嬉水時間），家庭更衣室都係滿咗。經過幾個星期觀察，我發現啲家長嘅玩法係：小朋友繼續玩水，爸爸媽媽提早入去霸位鎖門，甚至有工人姐姐放晒啲嘢入去鎖埋度門，等佢哋嘅「小寶貝」玩完水，然後就可以開開心心咁走過來敲門，佢哋先開門俾佢。但咁就令到正常使用者倒轉要等返佢哋

今日更加見到另一個經典例子——我已經預早5同我小朋友到家庭更衣室打算沖涼，當時門口有一個着住牛仔褲嘅爸爸喺度排隊。當排到佢嘅時候，佢啲小朋友仍然喺出面玩緊水。我就表示我小朋友已經到咗，不如我入去先，我會盡快出嚟。佢不停表示自己有兩個小朋友，所以想使用，但當時佢啲小朋友又唔喺度

我提醒佢唔能夠提前霸位之後，就入咗去同個仔沖涼。結果沖咗唔夠兩三分鐘，佢兩個寶貝就喺門口同埋佢爸爸瘋狂拍門，好似追債咁。原來佢兩個小朋友聲稱自己好凍，要我即刻開門俾佢。當時我仔都近乎沖完，所以我打開門睇吓咩事。其實本來真係有啲躁底，但係見到兩個小朋友好凍就唔忍心，所以請咗佢入嚟更衣室，叫佢哋先沖涼，我換完衫就走。

後來見到佢哋係一家四口，並非只有爸爸，原來媽媽都喺度。佢哋第一時間一齊入晒嚟，睇住我個仔換衫。我嗰刻喺度諗：其實男更衣室同女更衣室都係未滿，點解唔可以爸爸帶個仔入男更衣室，媽媽帶個女去女更衣室？而要好似尋仇咁逼我交返間房出嚟？

其實更衣室門口大大隻字貼住「請勿提前霸佔」，而且游泳學校亦都表明，家長冇小朋友嘅情況之下唔能夠提前幫小朋友排隊霸佔家庭更衣室。憑乜嘢你啲小朋友就係寶貝？因為驚你哋啲寶貝凍親，所以要其他已經上水嘅小朋友凍住等，等佢哋開開心心玩完水、沖完涼，先排到自己🙄

得你哋啲仔女係寶貝？我啲仔女唔係寶貝咩？

讀者投稿@T小姐