#ParentLicenses1821

睇到先前 #ParentLicenses1807 個post，樓主怨自己父母窮，令佢而家做咗人阿媽都仲怨緊自己父母做咩要生佢出嚟

延伸閱讀：#ParentLicenses1807 https://parentlicenses.hk/?p=2465

文中嘅父母並冇對佢特別差，只係因為經濟問題，所以即使樓主鍾意飲益力多，但屋企唔可以成日買，玩具亦唔可以下下買佢最想要嗰樣之類。文中亦有提及到父母喺佢細個嘅時候買好多練習俾佢做，相信係有心想栽培佢，但又冇咁嘅資源同知識。如果我係佢父母，知道自己個女咁多年嚟都咁嬲父母生咗佢出嚟捱苦，一定會好傷心

令我想投稿嘅原因，係因為我成日見到人留言話「窮人生仔正仆街」。其實每次聽到呢句都會令我個心好唔舒服，想分享自己嘅小故事

我阿媽出生自一個小康之家，係孻女，結婚前冇捱過一日苦，公公婆婆當佢如珠如寶，然而當佢嫁咗俾我阿爸之後就係惡夢嘅開始

婚後阿媽同奶奶同我一班姑媽同住，一屋共八個人。佢哋當我呀媽係工人咁蝦，一日做足全日服侍佢哋，完全冇得休息，仲經常精神虐待鬧我阿媽係賤女人，甚至講啲更侮辱性嘅說話，例如話都唔知我係咪我阿爸親生，而更甚係我呀爸從來都冇幫過我阿媽出半句聲

後來我阿媽終於頂唔順，離咗婚，帶住仲係BB嘅我返外家，但婆婆過咗身之後，公公另外組織咗頭家，有時仲要我阿媽俾家用佢，所以當時我同我阿媽生活非常困難

嗰時我哋住喺親戚屋企，係啲好舊嘅唐樓，兩房六個人住，我好細個就明寄人籬下嘅感覺

後嚟我入咗區內嘅band 1一條龍中小學，身邊同學多數都係嚟自中產家庭，住太古城、北角半山、大坑咁。因為家境唔同，所以見識都爭好遠，令我成日覺得自己係大鄉里，更時不時會因為唔識啲社交禮儀或餐桌禮儀而出醜。有啲衰嘅同學更加會冷嘲熱諷我屋企窮

然而，我從來都冇埋怨過阿媽生我出嚟，因為我見到佢由十指不沾陽春水到變成好努力工作，每日凌晨四點就起身返工，已經盡晒能力。喺嗰個年代，單親媽媽好易被社會標簽，班同學嘅冷嘲熱諷反而激發起我要更加努力、生性，唔可以令媽媽被人話唔識教女或者點做人阿媽

不過，我阿媽就算見我讀書咁叻，都唔會話旨意我第日要發達、要養佢，反而佢見我讀書咁大壓力，仲會同我講：「你唔一定要成為人中龍鳳，媽媽只係希望你幸福快樂」

大學嘅時候，啲中學同學都去晒外國讀書，我好明白屋企冇咁嘅本錢，冇咁嘅後路，所以就搏命咁讀書，最後靠獎學金入到本地大學讀專科。出嚟做嘢之後，好多呢個專科嘅同事都係世襲，屋企幾代都係做呢個專業，書香世代，見嘅世面自然比我多好多，工作頭一兩年亦都有被大老板話我「唔入流」

的確係有唔開心嘅，但與其怨自己個出身背景呢個無可改變嘅事實，我寧願花啲時間喺增廣見聞上，同時努力學習談吐、言行舉止，希望靠後天努力都可以彌補返先天嘅差距。工作幾年後，當你工作有表現時，人哋都唔會再計較，或者記得你嘅出身

到我遇到我老公，佢都係基層出身，老爺奶奶後生嗰時每日喺工廠做足12個鐘，全年無休咁養大我老公，而家我老公都成為咗另一個範疇嘅專業人士。雖然我老爺奶奶學識有限，但佢哋都係心地非常善良，處處為人著想，盡量唔想打擾到啲後生

直到生活條件好咗，有自己嘅小朋友，有能力送小朋友讀好啲嘅學校，自然身邊都會係啲環境唔錯嘅家長，不過有錢係唔一定等於識教。我見過大女嘅同學小學二年級已經著住Gucci 衫、Gucci波鞋，拎Burberry手袋，仲要周圍問其他小朋友有冇呢啲：「媽咪話呢啲唔係人人都有㗎」另外亦有家長喺BB四個月大嘅時候，已經每日要佢哋學幾個生字，睇flash card，為嘅就係（家長親口講）「要贏在起跑線」

我打咁大篇文，只係想講「窮人唔一定唔識教仔，有錢人亦唔一定識教仔」，唔應該用錢去衡量一個人有冇資格生仔。當然都有好多窮人係真係純粹想養兒防老，但唔應該以偏概全咁話晒所有窮人，而有啲人都唔應該純粹因為屋企冇能力俾你想要嘅嘢，你就怨足父母幾十年

其實一個咁大個人有手有腳，頭廿年生活唔好，之後仲有幾十年係靠你自己，唔好遇到啲咩生活唔如意嘅事就怪係原生家庭嘅錯

我係八十後，依然相信「心態可以決定命運，知識可以改變命運」

圖片來源：WhatsCap
文章來源：讀者投稿@純粹路過