有種「好」,叫「我都係為你好」

#ParentLicenses1819

首先我要講我知我屋企人好錫我,但我發覺自己有啲由細積到大嘅感受不吐不快,最近又經常諗起,唔知同邊個講好,所以想借呢個平台表達下,可能要分幾篇都唔定,希望選中我啦

我屋企係香港典型嘅雙職家庭,父母忙搵錢,呀爸成日要出差,呀媽喺跨國大公司做。當初係意外有咗我嘅,所以由細到大都係由工人姐姐湊

印象中轉過好多個姐姐,好多都因為借錢或者同我哋屋企唔夾而炒咗,所以細細個我要成日適應唔同人。有時啱啱適應咗一排又突然轉人咁,慢慢就令我有段時間好憎工人姐姐,覺得點解好似冇人想照顧我,我好似個波咁被推嚟推去

有一次印象好深,當時係去公園玩時俾人恰,想搵姐姐求救,但佢喺另一邊同人傾緊計聽唔到。喺嗰一刻感到好無助,之後我唔開心咗好耐,而我細個又唔識點同佢哋溝通,佢講中文我唔明,我講啲英文佢又唔明,所以關係好差,甚至記得同某個姐姐成日嘈交。直至搵到個姐姐一做就做咗廿幾年,慢慢大個關係有好轉,但唔算好close

當然我爸媽就覺得有人幫手湊好好,推論我係好幸福,有人照顧,唔使咩都自己做,唔似佢哋以前咁,咩都要自己嚟,又冇人理。其實喺我眼中,係無視我嘅感受,合理化佢哋嘅決定而已

我明,又要返工又要湊仔好辛苦,請工人幫手無可厚非,但佢哋自己都依賴咗工人,事實並唔係只係照顧我,係照顧埋佢哋。有時重話要當姐姐係屋企人,我覺得呢句話好虛偽,因為佢哋嘅言行根本就好冇說服力——當冇事發生嘅時候咪屋企人囉,做錯嘢就發脾氣鬧佢好蠢呀,煮餸煮得唔好等等。嗰種由上而下嘅態度,重講咩野屋企人啫?重有無數例子不能盡錄

由細到大佢哋都俾豐富嘅物質資源我,學過好多嘢,亦擁有好多嘢,物質生活一啲都唔缺乏。雖然我知道佢哋好錫我,但心理上就唔係好感受到,硬係冇一種親密嘅感覺

上面提到我媽喺跨國企業做,工作好忙,個人都比較強勢,所以控制欲都幾強。記得細個時,一到weekend就會去尖沙咀買名牌衫,出街衫一定要經呀媽襯,當我唔鐘意會講啲情緒綁架嘅說話:「咁靚都唔著,我細個想著都冇得著呀!」如果堅持要著自己揀嘅衫,我媽就會一路出街一路話唔好睇,taste冇佢咁好之類

唔知係咪因為工作關係,呀媽變得好judgmental,咩都批評一餐。我當然明白每人有表達意見嘅權利,但佢嘅程度係唔意識到呢啲說話會傷害到人,亦都意識唔到說話嘅影響力,講者無心,聽者有意。雖然我有同佢提出過呢個問題,但得到嘅回應竟然係:「講下笑啫,都唔得呀」,所以我選擇沉默是金

講到我媽意識唔到說話嘅影響力呢,佢同老豆屋企嗰邊嘅關係唔太好,次次同佢哋食完飯都會同我呻,佢哋點點點唔好、點點點衰,係literally every time,老豆係唔知嘅。嗰陣我其實好樂意聽佢講,因為覺得係我大個女媽咪先會同我講呢啲野,同佢分擔下。自始我漸漸唔鐘意老豆嗰邊親戚,覺得佢哋係衰人,恰我媽咪

而另一方面又會諗點解老豆若無其事,令呀媽咁難受,心入面會有怪老豆嘅情緒。曾經有諗過不如直接同老豆講,但又怕搞到佢哋嗌交,我又會好guilty,心情好複雜。而家大個咗先發覺原來我一直carry住呢啲情緒,本身以為聽完就算,但其實下意識地將呢啲資訊入咗心我唔知

後來,我發覺父母年紀越大,發生咩事都好,越易怪落別人頭上。以前我認識嘅佢哋唔係咁,可能真係人大咗就要重新認識兩老,或者其實佢哋不嬲都係咁。舉個例子,有次呀媽唔小心將個電話擺咗喺自動消毒酒清機下面,咁部機就不停出啫喱落電話上面,佢之後竟然話部機唔應該擺嗰度,搞到整濕晒部電話,重要話返個職員轉頭,我聽到真係wow咗一聲

我打呢篇嘢唔係想怪責任何人,只係想疏理返自己嘅感受,釋放唔識表達嘅情緒,亦想提醒下新手父母要多關心小朋友,俾多啲正面回應。小朋友唔識表達,要耐心啲聽佢哋講嘢,多啲從佢哋角度出發,培養同理心

講到呢度好似有啲長,如果你能夠睇到呢度嘅話,好多謝你;如果有人想睇落去嘅話,我再分享多啲

圖片來源@血觀音
讀者投稿@物質小孩

error: