#ParentLicenses1812

我想分享今日所見：到底咩叫教養？其實唔係天生嘅，真係教出嚟

事源係咁，今日係星期六，喺架西鐵度，有個睇落4, 5歲細路只係企咗一個站就叫好攰，對住媽媽講：「如果有位就好」

細路嘅語調係同媽媽傾偈，冇扭計，亦冇發脾氣。同一時間，個阿媽就踎低咗，與細路對話

媽媽：「你好攰，好想坐，明嘅，但呢度個個人都啱啱收工，好攰，但你係玩完上車，你覺得應該邊個坐？」

細路：「啱啱放工嘅人，但我好攰」

媽媽就提供選擇俾佢：「你可以坐地下又得，挨牆又得」

然後細路就繼續乖乖地企喺度，老母就一直踎喺度陪佢傾偈，個畫面直頭有粉紅色心心

另一邊廂就嚟喇，車廂內出現另一個細路。佢睇緊YouTube，仲開大喇叭，嘈到隔離啲人皺晒眉頭，都仲繼續睇

終於隔離有人問：「可唔可以靜少少？」

老母聽完，一想收機，個細路即刻大叫，仲嘈到仆街

老母：「同你出街真係好煩，成日扭扭扭，嘈到人喇」

但老母對手繼續睇緊電話，個細路仍然一直嘈，一直郁身郁勢，大部分人都皺眉，好想踢佢兩母子落車

其實細路有得教，唔好依賴個工人同四大長老就得。現實就真係睇到啲人平時唔點理，返去做假日父母，自拍下扮溫馨就想嘔

冇人迫你生，生完唔識教就唔好生

讀者投稿@角落生物