ParentLicenses1808

見到你個 #ParentLicenses1801 故仔，令到我都好想分享下自己嘅故事——我都係「天生天養」生產出嚟嘅小朋友

延伸閱讀：#ParentLicenses1801 https://parentlicenses.hk/?p=2425

因為爸爸係撈偏，意外懷孕嘅媽媽又唔想湊小朋友，所以我被一生出嚟就扔俾嫲嫲湊。但又因為嫲嫲老，有時湊唔掂，我就輾轉去咗唔同親戚度寄居

我都同你一樣，係喺升小學時攪珠入咗間名校。當時我身邊同學仔嘅父母都係專業人士，唔係醫生、律師，就係大學教職員；每次去同學屋企玩真係令我開咗眼界，好想自己將來都有能力住大屋，擁有齊齊整整嘅家庭

因為呢間好學校嘅基礎，我讀書嘅路好順利，升中學同大學都係想讀咩就入到，仲拎過唔少船（獎學金）

讀大學時識咗而家嘅老公，大家都係基層出身，冇父母幹，靠自己入大學。成班就只得我哋兩個日日放學都要趕頭趕命去返part time，所以就特別啱傾

畢業後因為我哋兩個都係專業，人工好快就上咗去，畢業三年後，兩個加埋月入六位數，就決定結婚。但對於生仔呢個課題真係好猶豫

身邊三姑六婆、同事、朋友、親戚都覺得我哋搵咁多，兩個又讀到書，好有條件生仔。但就好似你咁講，如果冇四大長老幫手，真係談何容易

而家疫情嘅關係，請工人都靠唔住，我哋仲要供樓，唔係咁容易一下子少一半收入，好多嘢都要從長計議。但講出嚟好似冇人明，冇乜人認同我哋嘅決定，只係好輕易就講一句：「要趁後生，早啲生」

睇到你個故事，我真係好有共鳴。我希望多啲人明白，生同唔生，本身已經要考牌

圖片來源@葉問2
讀者投稿@同樣基層嘅中年女人