我好細個時已經明白「窮」嘅悲哀

#ParentLicenses1806

睇完文章《為難女人的,就是女人》有感而發

延伸閱讀:#ParentLicenses1801 https://parentlicenses.hk/?p=2425

我想講我完全明你感受,因為我同樣都係一個來自基層家庭嘅中女。我老豆曾經婚姻失敗,到70歲嗰年返大陸農村娶咗當時30歲嘅我阿媽。簡單啲講,就係大家都好厭惡嘅老夫少妻中港家庭,仲要係住公屋拎綜援添

好記得細個乜嘢玩具都冇,更遑論興趣班

當所有同年小朋友個個學琴學舞,而我只卑微地提出想學畫畫時,我父母就只係同我講:「學呢啲冇用,又搵唔到錢」

當人哋放假全家去玩,甚至去旅行,我哋就只可以留喺屋企盡量減少外出,因為爸媽連帶我岀去食茶餐廳都覺得貴

所以我好細個時已經明白「窮」嘅悲哀,亦都只能硬食呢種悲哀,因為小朋友從來就沒有選擇權

到咗中學,為咗爭取正常生活,我16歲就開始放學做兼職,當中嘅辛酸同壓力係正常同齡人唔會想像得到。我仲好記得當年放學去做麥記,撞到一班同學過嚟買嘢食,而我咁啱就喺隔離拖緊地。同學呆咗望住我,然後議論紛紛嘅表情,嗰一種難受,係即使到咗今時今日,我都仲記得好清楚

捱到大學畢業然後岀來工作,後來結埋婚,托賴兩個人加埋月入都有5萬,當然唔算多,但都叫夠錢買到層樓,先至終於成功擺脫原生家庭

然而,上年置業後,一直好中意小朋友嘅老公不斷說服我生,仲話:「大家都已經30歲,再唔生就變高齡產婦」

我費煞思量,計過條數,扣除開支後,發覺根本就唔夠錢去養大一個小朋友;又或者養大咗佢,我哋就未必夠錢退休安老,難道要好似我老豆咁老咗就靠綜援渡日嗎?定唔通旨意小朋友大咗養返我呀?

其實香港真係一個好悲哀嘅地方——想生,都唔代表你有資格去生;好啦,當你夠錢去生,你又未必有時間同佢相處。當雙方父母都搵錢嘅情況下,而家啲細路都係經由工人或者老人家去湊大。作為雙親,連親自養育佢、灌輸價值觀俾佢嘅時間都冇,只會枉為父母

藉此向各位提倡天生天養嘅窮人,希望你哋唔好再咁天真,唔好不自量力地害咗下一代,因為我可以話俾你聽,喺呢個咁重物質嘅社會,做窮人嘅小朋友真係好撚吃力、好撚辛苦,而心中嗰一種自卑,更加係根深蒂固,跟足你一世!唔該你哋唔好再自欺欺人啦,醒下啦左膠們!

讀者投稿@另一個中女

error: