#ParentLicenses1771

上次個故事講及一個疑似自閉哥哥講粗口兼上堂打細佬，見啲人留言話教師唔識處理，容我再闡述多啲

（延伸閱讀：#ParentLicenses1759 https://parentlicenses.hk/?p=2096）

首先，唔該大家要知道全班唔係得佢一個，唔係話佢係自閉童，我就要容許佢喺全班面前講粗口、打細佬、騷擾同學，佢只係煩住其他同學郁手，係咪佢郁手都要其他同學、老師一齊俾佢打？

佢唔係我哋自辦學以嚟嘅第一個自閉同學，除此之外，過度活躍、專注力不足、讀寫障礙，通通都有收過，所以就算普通小朋友上堂都整蠱做怪，雖然唔期望每個學生都乖，但基本有咩情況、有咩表現，我哋都會了解

有特殊情況嘅同學叫人食屎、用書打同學個頭、跑嚟跑去、不停照鏡，基本上從家長所講及嘅咩情況，我哋唔會質疑，但都會觀察。而今次經我哋嘅觀察，就係其實所謂嘅「自閉哥哥」係冇自閉症

另外，當其他家長同我哋講及自己小朋友嘅情況，都會喺小朋友唔在場嘅時候細細聲講，然而該阿媽就喺「自閉哥哥」企正隔離時，兜口兜面大大聲講，即阿媽自己唔怕佢聽到？簡單講，由幾個老師觀察所得，哥哥其實冇事，只係個被縱壞咗嘅細路，阿媽話佢自閉，純粹係為哥哥嘅行為開脫

有情況嘅同學，發作起上嚟係唔會理對方係邊個。試過有同學氹極都冇反應，成堂坐喺度搣手指。「自閉哥哥」本身都橫，成日騷擾身形細過佢嘅同學，相反遇到身形大過佢就唔敢行埋去。「自閉哥哥」一出課室就打工人姐姐，平時細佬同阿媽投訴，阿媽問起佢就賴細佬，而當超高大嘅爸爸來接佢，就即刻變做好乖咁

佢唔係第一堂嚟就講粗口，上咗幾堂後，其實我哋已經覺得哥哥唔似自閉症，因為溝通對話完冇問題，直情講嘢好寸，成日話自己讀國際學校睇唔起其他同學，但又鐘意搵人玩；上堂教佢嘢有時會聽，如果係校長（好大份的伯伯）教，佢表現到超乖添。又再簡單講，所有自閉、過到活躍等等嘅症狀同表現，佢都冇

有情況嘅學生接觸得多時，我哋係會見到平時家長無留意嘅地方。我哋連同學脊椎彎咗都發現到而父母係冇留意，我哋叫佢帶小朋友睇醫生先照到。既然佢阿媽覺得喺個仔面前話佢有自閉症係冇問題，咁同佢阿媽講你個仔講粗口有咩問題？我唔講，行出門口佢細佬都會講。假如其他同學學咗粗口，返嚟家長投訴問我哋點解唔制止又有冇問題？我地淨係為顧佢一個，而放低十幾個同學唔理又有冇問題？

我哋從來冇標榜過專教特殊需要嘅學生。我哋係咪專門教特殊需要嘅同學？唔好意思，我哋唔係，但任何同學都歡迎。大把有情況嘅同學長期喺度上堂，上堂喊住嚟笑住走都唔少。如若阿媽聲稱佢有自閉，我就要容許佢對住大推同學上堂講粗口，對唔住，我做唔到

又假設，你試吓你仔女去上興趣班，但學咗粗口返嚟，你會覺得點？

讀者投稿@老師