![](https://i0.wp.com/parentlicenses.hk/wp-content/uploads/2022/05/1763.png?resize=740%2C740&ssl=1)
#ParentLicenses1763
兩年前,疫情仲係高位嘅時候,我咁啱搵到間平嘅樓上鋪,就租咗嚟賣藥妝
因為係小店嘅關係,其實每樣產品都唔多存貨,同埋我哋係賣市面唔普遍嘅化妝品同藥妝,所以一般靠ig shop吸客,門店係半取貨同倉擺貨咁用
我哋有一班熟客嘅,啲熟客都知道晒我哋嘅營運模式。一般佢哋喺whatsapp落咗單,俾埋錢,再上嚟拎貨嘅形式,儲埋用順豐收貨
開業兩年都好少有人直接上門市睇貨買貨,因為我哋ig有晒所有貨品資料同相片,而且門市都唔係喺市區,唔會無端端行街搵到
話說今日有位媽媽帶個兩個仔仔上嚟門市行,話係朋友介紹,因為門市唔係大,而且佢嗰兩個仔真係好活潑,手多多咁逐樣產品拎上手搞下
我真係好驚,心諗:唔好係呀,前兩日先一單轟動全城嘅事情發生,今日就有兩個小朋友上嚟搞搞震
佢哋嘅呀媽全程掛住睇貨,完全由得佢哋兩個搞,我唯有同媽咪講聲
我:「我唔想打爛嘢,佢哋整親就唔好」
隨後我就俾咗兩張櫈佢哋坐喺收銀附近,我話:「太太,我呢度有兩張櫈 ,介唔介意佢哋坐低喺度,我幫你睇住佢哋?」
個媽媽依然好專心咁試啲產品,講咗聲:「好呀」
未幾,佢仔仔問我有冇嘢玩,我眼都突埋,真心覺得自己變咗托兒所負責人
我即刻問佢呀媽:「有冇嘢俾佢哋玩?」
呀媽拎咗部手機出嚟俾佢哋玩,我心諗:好過冇……
佢呀媽真係當咗呢度係托兒所,足足喺度留咗兩個幾鐘,佢手機俾兩個仔玩到無電,仲要問我:「有冇得叉電?」
我梗係答:「冇」
臨尾佢淨係買咗一樣我哋舖最平嘅嘢,仲話下次再嚟睇,我即刻話:「其實我哋係要預約的,下次上嚟要先whatsapp ,我哋驚冇人開門俾你」
實際係我真係唔想serve你個幾十蚊,但要幫你湊仔
10歲以下唔使負刑責,真係搞著我哋小店主,因為真係好多老奉父母
讀者投稿@藥妝店小店主(自重人重ok?)