#ParentLicenses1762

呢個係女人重男輕女嘅真實故事

我老豆嗰邊係重男輕女嘅家庭，老豆排行最細，對上有n個家姐

聽返啲姑媽講，以前爺爺嫲嫲會將最好嘅留俾老豆，例如係雞髀，淨係留俾老豆，啲骨呀剩菜就留俾姑媽等等

睇到呢度，會唔會以為啲姑媽因為小時候身受其害，第時結婚生兒育女就對啲仔女公平？答案係唔會

我其中一個姑媽有一女一仔，即係我表姐同表弟，姑媽錫到表弟好燶

表弟話要遊戲機，即買！
要電話，即買！
要名牌，即買！

食飯一定開住部電視俾佢電視汁撈飯，所以一個晚餐食成三個鐘；小學嗰時一地都係玩具，唔使佢執，表姐執，表姐唔執，就淨係打表姐

表姐乜都冇擁有過，連佢細個著嘅衫，都係其他表姐唔啱著先俾佢；大個少少有月經，姑媽都唔會幫表姐買m巾，由得佢漏

面對林林總總嘅忽視，表姐早在小學嘅時候已經自殘，我細個仲要唔識死問佢：「做咩啲手手腳腳咁多一劃劃嘅？」有段時間我媽成日開解表姐

而家大家都係成年人，有工作，但表弟都係攤大手板問屋企拎錢，連學車都係姑媽出

表姐幾年前結咗婚，搬咗出去住，我好戥佢開心可以離開呢個地獄，但佢依然俾家用，每星期都探姑媽，但姑媽都係望都唔望佢

我真係好想同姑媽講：「你對個女咁差，人哋結咗婚，搬埋出去，都俾家用你，又得閒嚟探下你，點解你好似都唔當你個女係人？」

如果大家或者身邊嘅人係有男女不公平嘅思想，諗住生個仔又唔理個女，或者生個女又唔理個仔，真係唔該唔好生，唔好害人

讀者投稿@無名