#ParentLicenses1736

究竟係我愚孝，定家姐不孝？

爸爸差唔多70， 近年身體多咗病痛，經常要出入醫院

有去過政府醫院嘅都知香港醫療負荷有幾爆煲，尤其呢兩年疫情，覆個診起碼排你大半日。因為實施社交距離，輪候區冇咩位俾你坐，罰企之餘，仲要睇完一個部門再搭?上上落落去第二、第三個部門，排完呢樣又嗰樣，唔好話老弱病殘會吃力，就連我哋後生陪佢等都覺得攰

媽咪嘅身體狀況托賴OK，但因為疫情關係，加上佢腳關節又唔太好，所以通常都係我同家姐兩姊妹輪流陪爸爸覆診

後來家姐開始搬出好多藉口，一時話請太多假俾公司詐型，一時話外傭姐姐病咗，一時又話醫院多菌驚惹到俾小朋友

家姐有幾次仲話懷疑自己確診，為公眾著想，唔想做行走中的病毒，就走嚟教訓我：「你又冇小朋友，flexible過我好多，好心就多啲陪爸爸去醫院」

就算要我請no pay去都絕對唔係問題，只不過通常隔多幾日就會見到家姐出post，一家生生猛猛咁周圍吃喝玩樂。雖然佢堅稱唔係同一日，但見到佢笑個樣，我就笑唔L出

可能連爸爸都覺得唔好意思成日要我哋請假陪佢，有好多次佢都話自己搞得掂，唔使陪。家姐當然即刻俾like啦，仲話我：「成日當老豆廢，好傷佢自尊，佢仲唔開心」

直到有一次，我收到醫院電話話爸爸因為覆診等?等得唔耐煩，於是自己行樓梯仆咗落嚟，仲跌爛埋部電話

家姐話臨時臨急公司唔俾請假，又話覺得老豆似attention seeking，但後來我懷疑佢嗰日成家去咗staycation

其實你唔想去，可以直接講，我一個去接爸爸都OK㗎

當日去到醫院，姑娘同我講話我爸爸成日都唔認老，仲問人可唔可以叫佢叔叔，唔好叫伯伯；有時醫生同佢講病情，佢扮明，其實又唔係好明，叫我哋下次最好有個後生陪吓佢

唔知係太嬲定太內疚，我嗰日成程車喊到收唔到聲，成三十歲人最後都仲要個老豆當我小朋友咁安慰返轉頭

抑壓過後，我同家姐開片，我屌鳩佢不孝，佢屌返我愚孝，仲發爛渣話我：「冇小朋友根本唔理解作為working mom行唔開嘅難處」

喺爸爸嘅病情開始比較反覆時，家姐竟然宣布移民，上年年尾冚家飛埋英國

我有問佢：「會唔會考慮將計劃延後，等爸爸病情穩定先走？」

家姐：「香港而家搞到成篤屎咁，為咗下一代，走係刻不容緩，冇得傾」

三年前七月，我夠有叫你為咗「下一代」一齊去維園，但你話危險揀咗去主題公園咋嘛

最後，佢當然又出絕招啦，話我：「冇小朋友，根本唔會明做父母嗰種燒到埋身非走不可嘅急切」

再續道：「個女再大啲先過去會學唔好純正英文，適應唔到英國生活」

當年家姐會考炒車，之後爸爸供咗佢過澳洲讀書，佢好介意自己太遲留洋講唔到ABC口音

總之，佢一句「為咗下一代」，我哋「呢代」同「上一代」通通都要讓路

道理或對，但是否人情卻敗？

年初，即家姐移民後一個月，爸爸多次進出ICU，來回地獄又折返人間，因為爸爸隨時會走，醫院酌情俾我同媽咪疫情下照探病

我叫咗幾次家姐返嚟，但次次都俾佢話返我：「你唔理智同冇腦，即使我返到嚟，爸爸病情都一樣會惡化。再者香港當時正值第五波高峰期，返港除咗要嘥時間隔離，萬一期間我中咗招，惹俾爸爸仲大獲」

咁唯有視像囉，但十次有九次佢都只係隊部電話俾個女，自己講兩句就行咗去，不過我知爸爸即使隔住個芒，見到佢哋都係好開心

三月中，爸爸離開咗我哋，因為遺體有omicron，只能直接火化，遺憾無法辦一個體面嘅喪禮，正式道別您

家姐都有悼念爸爸，喺Facebook悼，仲呃咗300幾個like同一個嬲，但佢依然以疫情為由，繼續no show

記得每次幫爸爸攞張身分證去醫院登記時，一打開佢銀包都會見到我同家姐細個張學生相；記得細個食物中毒，爸爸一手抱家姐一手抱我，好man咁衝入急症室；記得6月某日，爸爸帶我去維園嘅燭光晚會；記得佢會講好多我出世前嘅事我聽

記得嘅太多，時間卻太少

我成日覺得唔係我陪爸爸走最後一段路，反而係爸爸媽媽陪我走咗30年路，我其實先係最幸福嗰個

辛苦您，您終於可以好好休息啦

至於家姐，我唔肯定係咪做咗人父母後，就會無私自己下一代而自私上一代。我絕對認同家姐係一個好媽媽，生仔有考牌，但做人仔女個牌就好似突然間冇咗囉

上個月最後見家姐出post係話去歐洲散心喎，然後我block鳩咗佢

文章來源：讀者投稿@呀妹