#ParentLicenses1678

上次我講完我有一個爸爸，其實我仲有一個媽媽、一個細妹同一個細佬

正所謂孻仔拉心肝、孻女拉五臟。我家嘅偏心程度表都好明顯啦

由細到大，家裡大小事務都由我負責。不論係洗碗、抹地，定係細佬妹默書測驗，總之我媽口頭禪係「唔好大就唔好細；家姐衰，細佬妹都衰」，所以倆老對我特別嚴苛，但就對細佬妹就寵愛有加，試問我點會覺得佢哋唔偏心？

心理學嘅角度，要兄弟姊妹不和，只要父母對待不公平就可以。的而且確係，我細個好憎我細佬妹，但只係我父母灌輸咗好重嘅責任感俾我，我就算幾唔鍾意，我都會做好呢個家姐嘅本分，照顧細佬妹。絕對只限於係責任感，唔係愛

我天真嘅細佬妹就以為我呢個家姐好愛佢哋，佢哋就無條件地對我好，永遠都將最好嘅嘢留俾我

去到十幾歲反叛期，我終於反抗。但我妹不停嘗試拉我返嚟，不停做我同父母嘅調解員

後來我軟化，我開始去同佢哋溝通，去理解佢哋。其實，佢哋都唔係唔愛我，而係唔識愛我而已

諗返以前，佢哋都唔係唔愛我，都唔係真係好偏心，只係分俾細佬妹比我多一啲啫，父母嘅責任佢哋都盡晒

上年情人節我外婆走咗，佢係我最錫同佢係我覺得呢個世上最錫我嘅人。我好心痛，但同時我唔係好傷心，因為自問我盡曬做孫嘅本分

孝順佢，同佢出國遊歷，同佢去好多哋方，甚至佢有需要把屎把尿，我都會照顧佢

你問我臭唔臭？臭！你問我難唔難頂？難！但係佢係我最愛嘅人，做幾多我都甘願

佢走喇，至少我都可以問心無愧。而家我只淨下我父母！佢哋仲可以陪我走嘅路仲有幾多？我唔知道！

以前有多種回憶我都唔想記住，但希望以後每一段都係美好嘅。樹欲靜而風不止息，但願往後呢段路，我同佢哋開開心心咁行落去

圖片來源@封神榜
讀者投稿@無名