#ParentLicenses1668

見到有個post講起雪卵，就令我憶起有個識咗好幾年嘅同事。我得知佢想雪卵，而細佬喺婦科診所度做，所以我叫細佬幫佢安排做檢查

同事有個男朋友，有見過面，但唔係好熟，中佬一名，離咗婚，有兩個仔

個男人非常計較，例如我同事搬去同個男人住，個男人會收租同水電煤，屋企日用品都會每個月除返一人一半，每個月個男人就會開張單俾我同事收錢，所以我對佢男朋友印象麻麻地

我唔係話要個男人負責晒，但我覺得佢一樣一樣列張清單出嚟好老土，真係2條廁紙、1枝牙膏都咁樣列晒出嚟收錢

間中喺公司時，同事都會同我，仲有另外一個女同事呻下佢男朋友呢啲麻煩嘢，然而，同事依然好想同個男人結婚生仔

我就話：「其實個男人離過婚都未必會想再婚，仲要同前妻有兩個仔，加埋個男人咁計較，算吧啦！」

不過明顯同事就唔聽啦，咁我講又講過，暗示又暗示過就算

直到佢叫我細佬幫佢預約雪卵，當時我以為佢兩個終於拉埋天窗，點知原來只係同事一廂情願，無通知過個男人

我聽過細佬解釋，其實就咁雪同結合咗雪係有分別，雪咗之後用係難成功過結合咗先雪。同埋，我無記錯嘅話，香港法律好似係將粒卵放入子宮嗰刻要有合法丈夫同粒精都要係同一個男人，不過我唔100%肯定

點都好啦，我聽到佢自己去雪都覺得件事麻麻地，我都再同佢講叫佢諗清楚。我唔肯定同事實際年紀，但肯定嘅係35以上，所以都明點解佢想做呢件事

好啦，做咗幾次檢查之後，我同事可能睇小咗呢件事以為好簡單，佢就有啲膽怯所以無再繼續。後來就俾個男人知道佢做咗幾次檢查，其實都唔平，佢都使咗「少少」錢，個男人就好嬲，覺得佢嘥錢同嘥氣。我都同同事講最後一次：「個男人根本唔會理你」

呢個世界真係有人為咗生而做出好多浪費生命時間嘅事，同事，我希望你搵到個更好嘅男人啦

讀者投稿@同事