#ParentLicenses1640

話說因疫情嘅關係，康文署轄下個啲公園封咗，感覺多咗小朋友嚟我屋企樓下個公園仔玩

我仔係常客嚟，平時同住同一屋苑嘅小朋友都相處得好好，而今日有個長輩帶個小朋友嚟（應該7-9歲左右）

突然間，我仔大喊，話個哥哥打到佢個頭；當時再望一望，個小朋友扯住個長輩走咗去

我即刻追出去問：「係咪有整到弟弟個頭？」

個小朋友開頭可能驚我係鬧佢，但其實我只係想問清楚有無整到弟弟而已

我話：「真係有整到人，講一句sorry，唔係就咁走咗去」

小朋友就開始爆喊講sorry ，同時佢長輩都有講sorry

跟住就講咗一句：「小朋友有陰影，以前喺第個公園玩，又係整到人，跟住對方阿媽用粗口鬧小朋友」

我就話：「我唔係鬧你，如果弟弟整到你走咗去，你都唔開心，大家握手做返好朋友，一齊繼續玩」

最後小朋友先唔再喊

去玩損傷一定有，如果整到你個小朋友就用粗口鬧對方，你點解唔包住個小朋友？

我自問係一個開明老母，相信「打」同「鬧」唔係解決問題嘅最好方法，而「解釋」同「講解」先係最好方法

讀者投稿@老母