#ParentLicenses1631

大時大節去個朋友屋企度開party，幾對父母帶埋啲小朋友嚟

喺呢啲時候，小朋友就會自己玩玩具或者同其他小朋友玩；大人就要一邊同朋友social，一邊顧個小朋友㗎啦

點知，有一對父母真係純粹嚟食嘢咁款，甚少同啲朋友傾計之餘，重點係連自己小朋友都唔理

其中有次有個人拎住個吉嘅紙箱唔小心跣手，飛咗落地，咁啱跌正小朋友後面，即刻好緊張望一望，講咗句：「哇，好彩冇整到」

個小朋友即刻話：「你整到我呀！！」

其實個個都知冇整到，但唔通個大人同個小朋友講：「邊度整到呀？喺度扮晒嘢」

當然都禮貌性同小朋友「道歉」，但估唔到個小朋友仲想得寸進尺咁睥住佢，而呢個時候個父母完全冇出聲

其後，個小朋友喺度玩另一女仔嘅玩具，佢唔識整，個女仔就教佢，佢即刻發哂脾氣話：「唔係咁玩！」

除此之外，個小朋友又係咁「dup」個地下，又鬧個女仔。個父母又係覺得好fun咁望住佢，一粒聲都冇出

個女仔唔開心，走去同一個姐姐講個小朋友唔肯聽佢講，仲玩到個玩具整唔返出嚟

之後個玩具整返好，個女仔都拎返去諗住一齊玩，個小朋友隨即將佢手上嘅玩具飛去個女仔度，差啲打中個頭。對父母依舊係顧自己，直到有另一個媽媽出聲同個小朋友講：「唔可以咁」

然而，對父母都只係望一眼，完全冇理會過

有比較，就有傷害——望見其他小朋友都好有禮貌、好乖，就知呢啲人水平嘅差別

其實唔識教、唔想教，就咪生仔啦！出去玩帶埋個小朋友又唔理佢，基本家教都冇，學咩人生仔？！

讀者投稿@c