#ParentLicenses1597

今日見到Page出咗單報導話一個未夠10歲嘅男童傷咗一個9歲男童事件，勾起返呢件3年前發生喺我一家人身上嘅苦痛回憶

報道中，件事其實係好不幸，亦好唔啱，但係至少整傷人嘅男童母親都有到醫院親自道歉同講賠償，我覺得父母都叫返少少良心同責任感

然而，發生喺我哋屋企呢件事，就真係都今時今刻，我哋都得唔到一句「對唔住」，反之仲受到教會上上下下嘅指責。我真心對呢個基督教信仰已經完完全全失去信心，對教會好懷疑，亦唔想小朋友再受二次傷害，唔會再俾佢接觸教會人士

傷人者為一名18歲女生（簡稱G），受傷者為我家小朋友，主傷係傷及耳

我小朋友一向都有返開該教會，本身都返得開心同穩定，一直都放心佢返教會。而我因工作關係，唔能夠陪同，有賴住附近嘅鄰居幫忙接送，但其實人哋無可能時時刻刻跟都實，呢個我唔會怪人，而且我小朋友本身都有自我照顧及表達能力

回想嗰日，小朋友一見到我就爆喊。經過傾談後，才知佢喺教會被人打，當時其實唔知係邊個打，佢即時有痛到喊同大叫好痛，但現場好多人、好亂、好嘈，實在搵唔到邊個打佢，亦冇人理會，個個掛住影相、傾計

我小朋友就走咗返屋企，我亦冇心情去理會肇事者，只關心傷勢。小朋友話從後俾人用個波打到落個頭、耳、再打落手前臂。由於傷及到頭，而且小朋友話隻耳好痛，我即刻帶佢睇普通科醫生。醫生就開咗一星期藥，包含抗生素

服藥後一星期後仍未見狀況有好轉，遂即轉到専科睇，再食多一星期抗生素。我小朋友雖無血流如柱，但佢嘅傷係內傷！

其實小朋友喺教會俾人打，發生咁大件事，作為父母，事後打返去教會查問同工當時情況都係好正常嘅事！我目的亦唔係話要追湯藥費

起初係問教會：「到底當時發生咩事？」「有冇CCTV見到」「因為小朋友嘅傷唔係話食下止痛藥、敷吓冰就無事嗰種，到底係點打可以打到咁傷？」

傳道人表示唔知我小朋友俾人打傷，要問一問。經過幾日嘅調查，教會嘅回覆係冇CCTV，但當時有人見到事發經過，佢哋表示一個一個都打電話問完，查出以下結果

事源當日G和其他幾個朋友喺禮堂——冇錯，係喺一個用嚟崇拜嘅莊嚴地方打波，唔知點樣就打傷咗我小朋友，但就話當事人唔知道

我再追問：「G叫咩名？幾多歲？」

咁問嘅最主要目的係想知佢係咪認識我小朋友，會唔會之前有咩過節、誤會，年紀係咪好細個等等

但教會十分保護G，無講佢姓乜，唔透露平時點叫開佢，只簡稱為一位姊妹。再追問下原來係已經18歲，即係成年人！

我向教會表示：「其實G有心好，冇心好，但咁樣打傷人，係咪應該要講返聲對唔住？」

我續道：「亦加上佢唔係細個，唔係得幾歲，更加要有承擔。而我哋從小教導小朋友做錯事都應該要同對方道歉，聖經嘅教導唔係『教養孩童，使他走當行的道，就是到老也不偏離』嗎？」

然而，原來喺教會嘅調查過程中，G嘅娘親已經急不及待咁打去教會，又踩去教會嘈：「絕對唔會道歉，我個女（G）無錯，無可能傷到咁」

我其實都好想知你個女G何解打到我小朋友咁傷囉！？G娘親仲不停指滴我，小事化大等等

經過多個星期嘅電話溝通，我發覺教會不單保護G，更令我有仲感覺係「包庇」。原來G係由教會一手栽培出嚟，由於呢間教會係學校教會，而G由中一開始就喺呢間中學就讀。教會一向都重點栽培讀該校嘅學生，由於我小朋友並非該校就讀，喺佢哋眼中我哋就係Outsider。原來教會一直都唔係當我小朋友係一家人，開口埋口嘅「弟兄姊妹」「教會係一個大家庭」通通都係假

圖為我FB動態回顧找出嘅其中一張WhatsApp截圖，係教會嘅人點去指責我同我小朋友。其實當中嘅指責點止呢一小段，每次發送嚟都係千字文

起初啲WhatsApp信息係發送去我小朋友度，同時認識我小朋友同G嘅姊妹就係咁指責我小朋友，令到我小朋友情緒好唔穩定，好傷心，而且好受滋擾。後來佢哋再WhatsApp向我「發功」

其實本身呢件事就好簡單，我哋由頭到尾都只係需要對方G向我小朋友道歉，但一句「道歉」原來係咁奢侈，教會仲開口埋口叫我報警，呢下我真係覺得佢哋好無賴！

我單單就呢張截圖內容嘅回應係：

1）我令人家變

難道我哋就沒有家？我小朋友傷到咁重，而對方一句「對唔住」都唔肯，18歲仲出埋娘親，用眼淚嚟大我，我點止家變？我小朋友成個人生都毁咗！受你哋萬人指責，情緒都拖垮晒，我小朋友身心靈都傷晒，康復嘅道路係漫長，至今仲未好返

我小朋友對教會人士好反感，唔想再返教會，覺得呢個教會啲人好假，好驚基督徒，點解做錯嘢仲惡人先告狀，點解唔肯道歉？！

2）多年努力撒下嘅福音種子被我燒毁？

哦！為何唔係雙向？我要一句「對唔住」就可以毁咗G一生？令佢一生唔返教會？

有冇諗過，受害人我小朋友自己受咁重傷，而教會所栽培嘅嗰位成年人卻做錯事唔肯承擔，多年栽培係咪出現問題？

有冇諗過，我小朋友身心靈受創，得唔到一句對唔住，反被教會萬人指責，我小朋友就唔係值得教會珍惜嘅種子？

3）18歲都要話唔識大人世界！

要到80歲才懂？何況3歲細路仔都識做錯嘢要講對唔住！難道3歲又可以講「我未係好識呢個世界？」

咁佢永遠都係細過我呢個受害人小朋友嘅母親，唔通我要包容佢一世？

「包容」唔係咁解咁用囉！如你道歉完，我小朋友都唔肯原諒，你就可以話我哋唔包容、唔寬恕、我家教唔好

問題係你從來都無道歉，而G娘親亦強硬表示唔會畀G道歉。加上你唔係同我道歉，你係同我小朋友道歉呀！講咩我大過你啫？

G姊妹，呢啲係你學習成長嘅功課呀！你18歲都唔識道歉，我咪教緊你講對唔住囉！

4）一大班一齊喺禮堂打波打傷人，自己最後掂過波就係無辜

咁被你打中嗰個我嘅小朋友係抵死呀？點解唔問下當時同你一齊打波嘅為何唔一齊去承擔責任，推你一個出嚟？

5）打傷人，即時喊就係悔改嘅眼淚？

真係悔改點解係走咗去？事後亦唔肯現身道歉，「對唔住」三個字咁難？你嘅喊係唔敢面對，唔肯承擔責任！

我小朋友呢個受害人被你打完都即時喊咗，話緊俾你知係「傷痛」「委屈」嘅眼淚！

6）無愛無溫情可言嘅道歉場面

呢句堅好笑！誇唔誇啲？自己做錯，講句對唔住好應份！而我有話會打返你？我亦講明唔係要追湯藥費

你覺得道歉等如無愛、無溫情，我何嘗見你呢種溫室花做錯事唔肯承擔，唔係一樣感到無愛、無溫情？

7）G原本當日約好咗當面道歉，卻玩消失+失蹤

G就咁向某友人發咗一句「Sorry」，冇講內容，根本唔係一個道歉稿，亦非向我小朋友或向我發。嗰句「Sorry」到底係咪施襲者所打都未能肯定！只係一個截咗「Sorry」呢句說話嘅縮圖，無頭無尾，Sorry係指唔出現定係乜？

咁既然佢咁驚出現，而又講到自己有道歉稿，咁咪唯有書面道歉囉！唔係我咄咄逼人，反而係佢自己簡單複雜化！仲累我無啦啦請一日假返去教會會面

牧師當日嗰句代G道歉，只係講緊佢玩消失＋失縱，而非講緊打傷小朋友嗰件事。同時我亦當面問牧師，牧師亦覺得G道歉係應該，我哋要求唔係過份

其實唔識教就唔好生小朋友！18歲仲要搵阿媽出嚟，唔知G出嚟社會打工，係咪有咩事都搵阿媽出嚟幫佢執手尾呢？

唔識牧養就唔好辦教會！教會根本唔應該存在一班同工同姊妹係咁攻擊受害人及其家人

圖片來源@一世不做基督徒
讀者投稿@一世不做基督徒