#ParentLicenses1587

最近遇上一件事令我想分享一下「身教」真係好重要，而香港之所咁多西客（我相信做服務業嘅朋友一定認同），就係多得以下呢啲人嘅做人修養同心態，由上一代身教咗去我哋呢代，再一代傳一代咁傳落去

入返正題，今日遇見嘅呢件事係5分鐘內做咗幾個極差嘅身教

一個假日嘅早上，我同個女食飽早餐後，就打算搭車去同朋友玩。我哋喺車站等緊車，又有另一路線嘅車埋咗站嘅同時，就見到一位媽媽拖住個仔（目測3-5歲）喺對面馬路，交通燈仲係紅公仔嘅情況下，完全冇睇過交通情況就跑過嚟追車

然而，佢跑到嚟嘅時候，車門已經閂咗，於是佢舉手、揮手，但車已經係郁咗離開，所以係冇可能，亦唔應該重新開返門俾佢上

佢隨即就指住車長大鬧：「正仆街嚟㗎，咁都唔等埋，趕住去死咩！」

唔知係邊個趕啲呢？🤦🏿‍♂️

然後佢再同個仔講：「呢啲真係衰人嚟㗎呵，呢啲人曳曳係要鬧㗎！」

就係咁，佢就已經好好咁同佢個仔上咗一課差嘅身教堂；而我就亦可以同個女一齊分析呢啲反面教材

想講下我嘅諗法

首先，香港人的確係好鍾意亂過馬路，有時係趕係急，但你拖住個仔就係咪應該注意返安全？再者嗰日係假期，有咩咁急咁趕？真係走一班車都唔掂？而且跟返交通燈過馬路係一件由細就教嘅事，但家長又「教」返佢哋亂過，係好破壞佢從小培養嘅修養，呢個亦係屬於時間觀念嘅一環

第二，追車唔係問題，但要先明白，司機再停車開門俾你上唔係老馮㗎。等你唔單止係嘥車長嗰十秒八秒，而係全車人嘅十秒八秒。呢十秒八秒係可以影響好大，可能就係因為咁而唔順燈（相信揸開車嘅都知，一盞唔順就好大機會一直唔順），又可能就因為咁避唔過塞車，從而令車長可能就失去唯一一次痾尿嘅機會

第三，你喺小朋友面前咁樣鬧人，佢會學，你仲要教埋佢「鬧」係啱，咁佢就會以為唔等佢係錯。等你唔該都冇句，唔等你就仲要指住嚟鬧，從此小朋友就唔會識尊重服務業嘅人，養成客就是皇嘅習慣。咁樣可能會令佢地哋同大人一樣會去分咩職業係叻，咩職業係賤

如果唔再審視自己，呢啲咁差嘅心態就又會一代傳一代咁傳落去

圖片來源@逃學威龍
讀者投稿@花生爸