#ParentLicenses1567

純粹個人見解，唔認同可以兜路走

睇到一篇關於小朋友跌瘀嘅帖文，再睇埋啲留言 ，嚇到本人窒一窒！

唔知由幾時開始，香港啲小朋友整親、跌親就一定係個家長負晒全責？當然事主都負有一定嘅責任，佢影完相冇即刻拉走佢小朋友，呢個就係佢嘅責任

帖文中，事主亦都提及過自己好內疚同埋好嬲自己，咁算唔算已經檢討過同反省自己？

「睇實自己個女啦」「俾個小朋友入得去就預咗啦」等等……哇！個個好似聖人上身咁，真係難聽過粗口，講得出口嘅最好自己個小朋友從來冇受傷過！有冇諗過呢啲說話對好多受害者嚟講，根本就係二次傷害！難道小朋友因為違規逗留喺入面玩就活該受傷？

就係多得呢啲咁嘅言論，論調出事責任全在受害者一方，所以啲家長先會肆無忌憚咁放養佢哋嘅細路哥

事主引用返自身嘅經歷去提醒返大家呢個設施並唔適合小朋友去玩，原意都係唔想再有小朋友因為呢個設施而受傷啫，我想問問大家咁樣有咩問題？

你可能會覺得咁大個牌寫住唔俾玩，唔係遊樂場。喂啊，大佬啊！你有先見之明，覺得籠入面好危險，其他家長未必有你咁嘅覺悟㗎喎！

再者，個設計放兩個波波喺度，啲小朋友經過就一定係好鐘意呢啲嘢嘅，你覺得單一個告示牌可以阻止到咩？就算設計唔係為俾小朋友玩，入去影相打卡總可以啩？

睇返場地嘅相，我留意到入面邊邊位啲角都好牙煙吓，就算成人打卡都要好小心啦！同時我覺得商場係有責任去完善設施

正正係因為事主嘅分享，好多家長知喺入面玩嘅後果會點，先唔會俾自己嘅小朋友入去玩。如果大家都吓吓都講到人哋錯晒咁，當然我唔係話事主完全冇錯，咁以後邊個仲敢分享佢哋嘅經歷去警惕其他人啫？

讀者投稿@路人甲