意外真係一次都嫌多

#ParentLicenses1564

最近葵芳某商場有個大型嘅勞蘇打卡位,其中一個位置係一個粉紅色嘅鐵籠,鐵籠入面有兩粒巨型嘅士多啤梨波波,深受小朋友歡迎

囡囡入咗去籠入面玩,我靜靜地企喺個籠出面嘅最右手邊,影咗幾張相後就喺度望住佢哋玩

恐怖事情發生啦,我女企咗去最左邊個位置,眼見約3-4個小朋友推住個巨型波向我女方向轆過去

我女被佢哋推到角位,反應唔切,轆低咗,沉沒在喺個巨型波度。我女已經喊晒口咁狂尖叫,班細路仲猛咁用力推!我如果遲一步去喝止佢哋,恐怕唔止係一大撻雞蛋咁大嘅瘀青,分分鐘被佢哋個巨型波轆到窒息!

最令人心寒嘅係班家長,佢哋企正喺前面都冇人去阻止佢哋嘅小朋友,但我嗰刻顧住安撫個女都唔得閒去搵啲家長理論

之後返到屋企,我先見到我女大髀有個雞蛋咁大撻嘅瘀青,我咁大個女都未試過跌成咁,究竟佢嗰幾秒間經歷咗啲乜?真係又心痛,又嬲,又內疚;除咗嬲自己,更嬲嗰班家長!

我平時覺得小朋友喺玩嘅時候有小碰撞而導致跌親、撞親,都係在所難免嘅,好小事。然而經此一事後,睇怕我要對呢樣嘢改觀,因為遇著一啲放養式嘅小朋友會有咩後果真係唔知

最後,提提各位將會帶小朋友去呢度玩嘅家長,睇實自己個小朋友,呢個設施對於小朋友嚟講某程度上係有安全隱患,呢啲意外真係一次都嫌多

圖片來源@事但啦
讀者投稿@事但啦

error: