#ParentLicenses1557

成日見啲媽媽喺group度post相，問「BB有咩病？嚴唔嚴重？」又表示好擔心咁，大前提又唔去睇醫生

Comment中10個9個都叫你帶BB去睇醫生，但你又唔去，隔日又再post張相去第二個group度，其實媽媽你想要啲乜嘢啫，係咪想人答：「其實BB光合作用就得㗎啦！唔使飲奶就會大，乜都唔使理」係咪咁？

皮膚問題都算，啲留言乜嘢偏方都有，又唔知係敏感定濕疹定病，甚至comment有建議你用芫荽水、漂白水、金盞花水、金銀花水、符水、抗生素、消炎類固醇藥膏……乜都齊，媽媽你會選擇用乜？

曾經見過有個媽媽出post話跌親BB， BB喺大人床跌落嚟，頭落地，表示有啲擔心，擔心又唔去睇醫生，反而問網民分享吓有關經歷

Comment當然冇令佢失望，當中有三份一人都叫佢自己觀察，有部份人仲話自己啲仔女由細跌到大，有六個月已經成日周圍跌，周圍仆同碌落床都冇事，冇睇過醫生一樣健康長大，叫媽媽觀察下就可以

我睇完真係俾個叻你??

我就真係見過BB跌完之後頭骨裂咗要做手術，表面上係睇唔出嘅，上一刻好精靈，下一刻BB會忽然抽筋同嘔

媽媽你嘅一個小小決定，好影響BB之後行嘅路。若然BB腦出血又抽筋，之後唔好問人點解BB會發展遲緩喇

其實……睇醫生真係咁難咩?

大部份唔想睇醫生嘅，其實都係唔想使錢，希望上網問完意見後就唔使睇醫生解決

生仔前冇諗過BB有病或者懷疑有病應該要即刻帶佢睇醫生？有冇計劃好財政狀況先去生育？

BB唔識表達，唔舒服未必講到出嚟，而媽媽你係佢嘅守護者同照顧者，相信冇一個媽媽天生識做媽媽，唔識唔緊要，請慢慢學

圖片來源@睇醫生好難咩
讀者投稿@睇醫生好難咩