#ParentLicenses2399

話說早幾日同小朋友去搭開蓬巴士聖誕燈飾遊（行程經網上預訂），旅運公司出單憑證上列明咗以下注意事項

「所有座位於上車時自由選擇，不能指定。如有任何爭議，某某旅運有限公司保留最終決定權」

見到咁，我估座位選擇應該係同搭普通巴士一樣係「排隊」上車，並非劃位制。我再問咗負責人回覆都係咁，如果早上車咪早選擇囉

當時我哋同小朋友（共兩大兩小）都預早到達，登記完就成為第二位人士開始上車，同時都見到第一位上車嘅係一位女士。女士急步上去巴士上層，之後呢位女士就企咗喺上層車頭中間。我兩個小朋友都係諗住揀車頭坐，於是就行去車頭其中一邊嘅兩個位

女士突大聲同我講：「我有八個人！」

我呆咗，我以為我聽錯

我：「吓？我聽唔到，你講多一次」

呢位女士就再大聲啲，且瞪大對眼同我講：「我話我有八個人呀！」

八個人我只見到一個，乜而家喺鬼節咩？

跟住佢唔俾我小朋友坐。我心諗：唔係呀嘛，你一個人上車諗住霸巴士八個位同包晒成個車頭?

我同佢講：「咁你啲屋企人同小朋友喺邊？我兩個小朋友係跟住你後面上車，而家我哋已經喺個位度，唔坐得？」

其實我兩個小朋友已經企咗喺其中一邊車頭嘅兩個座位前面，但見個女人好惡就唔敢坐，只係凝望住我哋兩個對話

呢位女士再大聲講多次：「總之我有八個人！！」

講到呢度，佢其中一個家人終於上到嚟，望見我哋喺度爭執，遂問佢發生咩事，然而佢又講唔出佢一個人霸唔成八個位

我就話：「我同小朋友已經上咗車先同而家企左喺度，佢哋已經準備坐。一係咁，一人一邊」

跟住呢位女士先好唔忿氣咁講：「咁好喇！！」

之後大家每家坐一邊

其實一開始我都只係諗住俾小朋友兩個坐其中一邊車頭，我哋坐小朋友後面睇實都可以（有安全帶）。我明白好多小朋友都好鍾意坐巴士上層車頭，我小朋友都鍾意，所以上巴士前有同佢哋講定：「有得坐喺bonus，如果有人坐咗車頭，我哋可以揀其他位坐，都一樣開心」

呢位女士目標宏大，佢以為我好似佢咁，要成家霸足成個車頭

該女士同行都有兩個小朋友，頭先佢啲小朋友未上到車，所以睇唔到佢媽媽同我爭執嘅過程。我想像如果佢繼續堅持要一人霸晒所有位，我諗我一定會問佢：「乜你平時都係咁教小朋友㗎？」

對了，交通工具如需要咁樣霸位，咁應該要包晒成架車或者成卡車廂吧？

圖片來源@葉問
讀者投稿@干