#ParentLicenses2022

同男朋友喺大角咀食晏，隔離位係一個女人同一個女仔。從佢哋嘅言談內容，知道佢哋唔係母女同學校師生，後來聽到好似係姨媽姨甥嘅關係

啱啱開始食冇耐，眼尾睄到有舊嘢從個女仔度飛去我腳邊，咁我就望下係咩嚟，原來係一舊好大舊嘅雞

我男朋友問我：「你有冇整到？」

我係咁意望咗兩眼鞋同褲，就答佢：「冇」

我隨即就望下個女仔，佢應該喺度悼念緊自己冇咗舊雞；我再望下個女人，佢望住個女仔，再望住我，隔咗陣，個女人同我講「對唔住」，然後就沒然後

我都明道歉冇得逼嘅，個女仔唔道歉，我都冇辦法，而當下我嘅衫褲鞋襪又唔見有明顯污糟（離開餐廳之後先見到有汁嘅漬），就著自己多一事不如少一事

直到臨走時，個女仔由頭到尾都冇負過佢最基本要負嘅責任：執返我腳邊舊雞

我永遠奉信細路冇家教，大人要孭飛，就有臨走嘅以下一幕

我問我男朋友：「個女仔係咪冇講過對唔住？」

男朋友擰頭，然後佢就去咗埋單

我咁問係為咗要確保冇冤枉人，佢咁做（去埋單）係因為佢知道我要take action而相信我處理到

於是，我企起身同個女人講：「其實妳作為長輩係要教佢自己同我講『對唔住』而唔係妳去講」

個女人O咗咀望住我，我講完就轉身走咗

我都有對姨甥係同個女仔差唔多大，如果佢哋做錯，就算只係喺我屋企入面，我都要佢哋自己親自去面對自己做錯嘅事

然而，喺呢件事上，個女人竟然唔去教個女仔道歉，反而諗住咁樣就完咗件事，我覺得妳兩個就算見識晒全世界都冇用，因為最基本嘅嘢妳哋都唔識

最後，我想講，既然妳咁鍾意代個姨甥女負責任，妳唔代佢執埋舊雞？

讀者投稿@絕后廢j