#ParentLicenses1509

話說我喺意見格仔舖度做兼職嘅

今日返工嘅時候，有對母女嘅客人嚟買嘢。買完嘢後，即將離開嗰時，就過嚟問我廁所喺邊度，咁我就答咗佢廁所嘅位置，之後佢哋急急腳就走咗

當時我完全無留意到有咩特別，以為佢哋只係純粹問廁所喺邊，點知原來喺問嗰刻，個女已經急尿，忍唔到，仲喺正我喺鋪頭門口瀨尿！

地板係木紋，真係唔明顯，而且人又多，我好難第一時間發現，所以我都係喺佢哋走咗之後，隔離有個客話返我知個妹妹瀨尿我先知

重點唔係妹妹瀨尿，細路仔忍唔到我好理解，但係阿媽一粒聲唔出，就咁走咗去，真係好不負責任，好無公德心?

就算你可能身上無紙巾都好，起碼都可以同我講聲抱歉，話我知細路仔瀨尿，等我可以清潔都好啊

阿女咁就學識咗第時可以周街痾尿唔使抹啦?

讀者投稿@small potato