#ParentLicenses2643

我細個時曾被一個人哋阿媽指責，產生嘅陰影久久不能釋懷，今日想將件事分享講出嚟，當係試下讓我嘗試去跨過佢，唔好經過同一個位時繼續膽怯，望各位見諒🙏🏻

屋企樓下有間超市，當時我讀緊中一，阿媽去超市我要跟埋去，佢趕買餸行得好快叫我想去就跟實（當年中一冇手機，走失咗有排搵），我腳程短要快步加小跑先跟到

去到門口旁個小斜角，有對母女（應該係）側身企咗喺度，女仔約矮我半個頭。我冇留意佢哋做咩，而當時阿媽已經轉入咗超市（旋轉bar，冇得經同一個位出），我就小跑跟上去

經過個女仔時，佢隻手突然向前向上伸出咗少少，我膊頭就撞咗落佢手度。我窒住腳步擰返轉睇，原來佢打算飲利賓納，我撞到佢手嗰下個開口倒瀉咗落佢個身度，大概一兩啖嘅份量，下巴同衫領都有

當時我即刻講sorry，但我係兩手揈揈落去，其實咩都幫唔到佢，所以只係停咗幾秒後我講多次對唔住，就衝入超市搵阿媽。我確定兩次佢哋都聽到，因為兩次我講時佢哋都望向我

入到去阿媽已經攞好車仔望住門口睇點解我未嚟，我即刻跟返實阿媽行咗入超市。點知過咗幾分鐘，門口個女人喺超市入面突然衝埋嚟，個女仔喺後面面無表情咁跟住

個女人凶神惡煞同我講：「你頭先撞到佢呀！倒到成身都係呀！」但佢唔係同我阿媽講或搵我阿媽追究，而係直接衝過嚟就呼喝我

我勁驚，細細聲話「我有講『對唔住』……」

我媽隨即就問：「咩事？」

女人：「佢（指住我）頭先特登跑埋去撞佢，搞到佢啲利賓納倒到成身都係就走咗去呀！」

我再同我媽講：「我唔小心咋，我有講『對唔住』㗎……」嗰下真係好想喊

我媽好鎮定咁回應：「唔好意思呀，佢唔小心，我俾啲紙巾你抹返吖」跟住俾咗包新嘅Tempo佢

我望吓個女仔，佢除咗衫領嗰啲利賓納漬抹唔走之外，基本上其他地方都抹乾晒。最後個女人拎咗包紙巾，頭也不回就走咗，而個女仔全程係冇出聲，個女人走時佢就跟埋上去。跟住我阿媽就拖住我話：「我哋買餸啦」

大個後雖然好少去超市，但偶然要去時，經過同一個斜角位，我都會諗起呢一幕。除咗個女人凶神惡煞衝埋嚟指住我鬧個樣，後來諗返，其實我唔係太知佢衝入嚟追住我嘅目的。超市入口同出口隔大約兩個鋪位，但入面好深，一入咗去就要喺入面兜一大個圈先可以去到出口。我唔知佢真係為咗追究佢用咗嗰包紙巾定咩，特登都要行返入超市去追住我，但的確我媽只消一包Tempo就擺平咗，冇話賠利賓納或要我或我阿媽再道咩歉

事情就係咁，我希望再經過嗰個斜角位時，唔好再諗起🥲

讀者投稿@路人甲