#ParentLicenses2623

小朋友上跳舞興趣班，跳咗無耐老師叫參加比賽班，而一班有十幾人，總會有人企前，有人企後

每次落堂後，總有一個小朋友嘅家長（下稱「癲婆」）會拉住老師，盤問老師點解佢小朋友唔係企前面，點解佢小朋友唔係企中間，點解唔揾佢小朋友做示範云云

見癲婆咁緊張，我都留意下佢小朋友跳成點。慢半part、甩beat、發夢等等乜都齊，重好意思問老師點解唔俾佢小朋友企前啲？果然只要自己唔尷尬，尷尬就係人哋

又一年比賽班，老師見到家長就會預告新比賽班安排，大家都會喺群組內討論

突然有一日，癲婆捉住另一個家長嚟鬧，而鬧嘅內容應該得佢自己先明。重點大概係「你小朋友勤力咋，其實我小朋友叻過你小朋友」

我哋其他家長都呆咗，估唔到癲婆會無預警發癲，聞到一陣酸味同埋葡萄味

後來先知被人鬧嗰個家長嘅小朋友被老師揀咗跳單人舞，成件事即刻清楚晒，原來係癲婆眼紅人哋，所以就揾人出氣

平日見佢對自己小朋友有求必應，縱到小朋友橫行霸道，都會覺得只係因為佢太錫自己小朋友、溺愛小朋友而已，勢估唔到佢原來係癲嘅，一旦自己小朋友冇，都唔准其他小朋友有

其實，有邊個家長唔想自己小朋友叻啲吖，我都想我個女做主角㗎！見到啲叻人，羨慕妒忌恨，都只會一一收埋喺心底囉

個女考唔到第一，唔通就要去鬧考第一二三四五咩

相片來源@冇炭用
讀者投稿@小蕃茄