#ParentLicenses2573

本人第二次投稿，上一次投已經係兩年前揸的士嗰陣時嘅 #ParentLicenses1853

我喺半年前轉咗職做巴士車長，負責朝早揸5B巴士，由十二月開始到而家固定更表

喺早上七至八點時間，揸5B線嘅情況與同區揸1號入跑馬地嗰種hea相比就好唔同，因為入掃桿埔經過五所學校，加上去東華覆診嘅都會有乘客搭車，所以基本上喺返學日子到灣仔區後，各站皆會排滿學生。自己亦不敢怠慢車程進度，以免因上客時間拖太久令後續班次遲到

而今次投稿係講喺今日（五月六日）遇到嘅事，係有關喺史釗域道搭車嘅大陸人兄妹，同時間亦都俾睇故事嘅人有一個警惕，教育一下學童上車時守秩序的重要性

以我揸咗5B半年來嘅觀察，呢兩位兄妹同有一項令人側目的行為，就係喜歡喺上巴士期間衝上車，要搶先成為第一個拍八達通，而因佢哋衝得太快，兩張卡重疊咗令八達通扣唔到數時有發生

至於家長呢？媽媽在場時，有時唔會出現呢種行為，但時隔數天又再故態復萌。而發生這種事，更多嘅時候係佢哋婆婆在場時就會發生

至於今天婆婆送佢哋上學，就差啲出大事了

朝早約七時五十分，我如常到達埋站，睇見一個令我非常難忘嘅驚嚇場面。當時婆婆代佢哋排隊，而我用緊時速廿公里左右內速度接近九巴站牌準備減速停車時，佢兄妹突然從行人路大廈一側跑出巴士站路邊石壆，差啲就衝出馬路！

我當下反應迅速立即踩煞車，成功喺站牌前灰柱至輪椅標誌附近停底，幸好巴士上並沒乘客因突如其來口嘅急煞停而跌倒

隨後，佢哋一上車，我立即用普通話大罵唔好突然跑出來好危險，在場每日都會搭我呢班車送兒子上學嘅熟客媽媽睇見都不禁講：「日日都係咁……」

上車守下秩序啦好冇？我出事要寫報告之外，成街大把人等住搭返學㗎大佬！

讀者投稿@黃巴車長