![](https://i0.wp.com/parentlicenses.hk/wp-content/uploads/2024/05/2565.png?resize=740%2C740&ssl=1)
#ParentLicenses2565
有日我同小朋友(K1)照常去咗公園玩
當時我陪小朋友玩緊過三關嘅設施,第一鋪都未玩完,就有個小朋友A(大約K2至K3)突然間衝過嚟,繼而推開我小朋友,嚷著話要玩
我就梗係同個小朋友講道理。我同佢講:「我哋玩緊先,你想玩唔該排隊,唔好郁手郁腳」
A嘅媽媽先喺遠處坐喺度玩住手機用普通話講咗句:「人家先玩的」
惟小朋友A仍繼續喺我哋隔籬發脾氣唔肯走,話佢要玩,而A媽媽完全無動於衷
其實上面呢件事都算普通,我都遇到唔少次,見怪不怪了
其後我同小朋友玩捉迷藏。我小朋友企喺旁邊匿埋,附近無人亦無遮掩物。我行緊去小朋友身邊之際,呢位小朋友A從本來右邊遠處,突然間加速衝刺過嚟推跌我小朋友
我就即刻抱住我小朋友安慰佢,都未同我小朋友講到嘢,我望住呢位小朋友A又跑返去遠處再衝過嚟,好似又想推多次。見狀,我只好即刻伸手擋住(手掌向住小朋友A),以至小朋友A衝過嚟嗰下撞到我隻手就反彈跌低咗,自己坐喺度喊
我啱啱企返起身,然後嗰位小朋友A嘅媽媽就好似癲咗咁,一嘢衝過嚟推我,一直用唔鹹唔淡嘅廣東話話:「你作為一個大人,做乜要推個小朋友?!」
我有同佢講返件事,佢聽完嗰下停咗幾秒,又好似癲咗咁,繼續重覆講返上面嗰句。佢見我企得好穩推唔跌,就想郁手打我,咁我自然反應捉住佢隻手,始終唔想喺小朋友面前打交,更唔想好似之前見到兩個媽媽打架咁樣,我只係打算防禦
A媽媽見唔夠力,就突然甩開我隻手,扯我頭髮,我唯有捉住自己啲頭髮令自己唔痛。其實我可以反擊,但係我見小朋友喊緊,打算安慰佢先。糾纏咗一陣,好彩咁啱有保安經過,話佢再唔放手就要報警,佢先至放手
A媽媽仍然繼續講:「小朋友玩,推下好正常咋嘛,作為大人唔應該插手,要俾佢哋自己解決」
我:「其實如果佢哋年齡係差唔多,加上可以溝通到嘅話,當然可以俾佢哋自己解決,但係你個小朋友A高我小朋友成個頭有突,點樣自行解決?等我小朋友俾佢推多次?」
保安叫A媽媽冷靜啲,反倒鬧埋個保安,然後就帶住個小朋友急急腳走咗去
保安隨後同我講我額頭受傷,有條刮痕,咁我就報咗警,去咗驗傷同洗傷口。警察同我講影到公園個閉路電視咁啱壞咗,加上聽完我嘅描述,位警察就話因爲我有掂到小朋友,同埋聽我嘅形容就懷疑小朋友A好似有過度活躍症(警察話問咗附近嘅保安,講話見過A嘅媽媽試過喺度發生爭執),所以就算提告佢,我勝算都不大。因為小朋友推小朋友呢樣係唔計,就算呢樣係原因,我出手擋咗、掂到他人,就係我襲擊個小朋友A,而且亦都好難搵到嗰位小朋友A同A媽媽。警察最後都係勸我算數,建議我下次唔好咁衝動,可以唔用手掌擋,用身體擋住。其實嗰下真係身體反應,個腦都未反應得切,真係幾無奈
其實我都成日去唔同公園玩,真係第一次遇到咁嘅人,我亦都唔清楚對方係咪有精神疾病,因為真係發生得好突然。當然亦遇過啲好嘅新移民,有啲直情係嚟香港旅行經過個公園同佢自己小朋友玩,重用普通話同我傾偈添
今次真係當自己唔好彩,之後唯有少啲去呢個公園,同埋遇到推人嗰啲都快啲去第二度就算,因為都唔會知幾時會遇著個癲嘅。如果佢真係有精神疾病,佢打我都冇辦法,我還擊嘅話又會計互毆,如果下次咁啱唔好彩又遇到咁嘅事,真係都唔知點做好
事後我都一直同小朋友講,佢冇做錯,因為佢以為自己俾人推,媽媽保護佢,所以媽媽先俾人扯頭髮,話好擔心媽媽痛。唯有一直安慰佢,同佢講佢冇做錯,係對方唔啱,除咗咁樣都唔知可以點樣安慰佢。想問下各位家長如果遇到類似呢啲事,你哋係點樣安慰小朋友?等我可以參考下,感謝指教🙏🏻
讀者投稿@感到無能為力的媽媽