#ParentLicenses2512

出於環保原因，一直以來有啲唔要嘅嘢，特別係全新物品，多數會先喺我住嗰區嘅群組出post，睇吓有冇人有需要，有的話就要對方自行嚟屋苑免費取。咁我覺得因為物品係免費送出嘅，我都希望最少可以就到我地點同時間

曾經試過免費送出全新嘅BB、小童衫褲，有位男家長極速留言話要，之後問左問右，又問有冇牌，可唔可以影個牌嚟睇吓云云。其實喺我出post時有附上多角度照片，不過都算啦，我當佢只係比較謹慎，對衣物有安全標準要求

直到約時間，佢話要等佢收工揸車嚟取，想約晚上十點。咁夜都算，我當體諒家長不容易，點知到十點四十五分都未嚟。我真心嬲，我話：「我有嘢做，如果重未嚟到我就掉垃圾桶不能再等」

跟住就好似拍戲咁蹺，佢話佢到咗

大同小異嘅事都有出現，自始已經告誡自己唔好再攪啲咁嘅嘢，廢事自己攞嚟賤。點知自己記性太差，又執屋，又剛剛免費出啲玩具，就有位女家長極速話要，但講落去話要等差不多兩星期先可以來取。都算啦，期間佢嘅言語係希望約一早時間，或者係就晒佢時間地點

因為我屋苑唔近呢個女家長小朋友嘅上學地方，同埋佢接完放學要即刻返屋企，而佢屋企唔係屬我嗰區，所以佢建議嘅時間係早上。但我表明早上多數有嘢做，我又衰心軟咁，遷就咗佢早上快閃喺屋苑交收

其實唔同區已經好搞笑，同埋無時間又點解重要嚟攞呢？重有咩叫要即刻返屋企呢？

多謝咁多類似家長事例，我決定以後都做大晒鬼，掉落垃圾桶或者攞去救世軍捐咗佢。廢事俾人話我：免費送嘢重咁多要求，又話咩體諒家長基層blah blah blah

我重申一次，我出嘅post第一句寫明咩地點交收，最尾一句寫爽快交收。唔好問我點解心軟，索性話唔得咪算，我自己都解釋唔到。最後，我都唔係送啲咩垃圾，真係啲我用唔著嘅日本或者歐美衫同玩具或其他。點解要送唔掉，只係覺得太浪費睇下有冇人啱用啫

最後，唔明點解咁大個人都唔識分「唔該」同「多謝」，送完嘢有八成人同我講「唔該」

圖片來源@毒舌大狀
讀者投稿@What’s wrong with the world