#ParentLicenses2534

事源係我入咗Donki行街，身邊突然有個小朋友踩住滑板車轆過，我皺一皺眉，心諗點解個家長唔睇住個細路

不過我冇再理會，繼續自己睇嘢啦。去到下一個路口，小朋友又喺我身邊飛快轆過，但嗰下我聽到嘅係小朋友嘅喊聲

呢個時候小朋友已經飛快去咗好遠嘅地方，我望過去先發現佢好似盲頭烏蠅咁周圍樁嚟樁去，見狀我就追上去

我：「小朋友，做咩事啊？」

小朋友：「我媽咪唔知去咗邊😭😭」

死啦，近睇先發現佢喊到成個口罩都濕晒，即刻勁心痛。於是我拉埋小朋友去一邊，問佢知唔知媽媽電話啦

好彩佢記得媽媽電話，所以我就幫佢打電話。經溝通後，始發現原來佢媽媽已經離開咗Donki，而佢都係搵緊仔仔

咁我就收線之後陪小朋友一齊等啦。最後媽媽嚟到，小朋友大喊同時攬住媽媽條腰，而媽媽就嬲爆爆咁唔出聲望住個仔

想講嘅係，有時真係要教識小朋友好多嘢。第一樣最重要嘅，真係要教小朋友背父母電話。今次遇到呢位小朋友都好叻，問佢知唔知媽媽電話，佢都清楚記得，所以打到正確號碼，先幫佢搵到媽咪

而第二樣，其實可能家長都要教返小朋友，如果大家走失咗可以點做，例如喺鋪頭走失嘅話搵店員幫手就係一個好好嘅選擇

第三樣，家長要教小朋友識得如何求助

之前喺YouTube睇到外國有個案例，就係媽媽喺屋企突然中風/心臟病發，而現場就只得小朋友一個，個小朋友識打911向人求救，而且好清楚講到自己屋企地址等等，最後救返自己媽咪

雖然呢件只係一件生活小事，但我覺得個小朋友好叻，反映媽媽都教得好好（雖然嬲爆嘅媽媽可能未必咁諗😂，我喺一邊都好似聞到佢浸火藥味😂）。唔見咗媽媽係驚，係慌亂嘅，好彩都可以清楚話到俾我聽佢媽媽電話

讀者投稿@路過既怪姐姐