#ParentLicenses2443

我係早前出「尋找新生活」嗰個post嘅投稿人Emily

多謝大家關心，以及多謝大家對A君嘅祝福。請大家放心，我唔使搵定後路，一嚟我自己絕對應付得到，二嚟下文會講到我老公嘅蛻變

我只係睇唔過眼想略盡綿力幫一幫A君，輕輕扶一扶佢一把而已，並冇大家講得咁偉大，只不過係同佢食吓飯傾吓計，請佢幫忙陪吓弟弟玩（咁我可以偷懶一陣）。佢係我仔仔嘅哥哥，點計其實都算係我個仔，我都想佢好好為自己生活

至於我老公，當初我都好似大家咁，認為佢「識生唔識教」、不負責任、唔好好管教A君，又唔肯同A君溝通

佢的確係「唔識」以及「唔適」做人爸爸，因為我喺後來親眼見到佢同A君或者仔仔相處（兩個小朋友相差十幾年）時，我先發現佢真係唔識。佢係會因為怕同A君起衝突，所以選擇緃容。當然佢一直唔覺得係縱容，反而覺得係我對小朋友（我個仔）嘅管敎「太嚴苛」

喺佢嘅角度，愛錫小朋友就係唔可以令佢哋傷心、要有求必應、要遷就、滿足小朋友等等。佢忍受唔到小朋友哭鬧，唔係因為覺得煩，而係佢真心覺得小朋友扭計好可憐，令佢好肉赤。佢呢種觀念根深柢固，但我就覺得匪夷所思

佢並唔係對A君視而不見，但係實在唔識處理，無從入手，想講、想教又吞返落肚。每次同A君見面除咗買買買、食食食，根本完全唔敢提起管教嘅事，生怕同A君不歡而散，又怕A君發脾氣自己走咗去，或者又大吵大鬧

A君媽媽消失之前，基本上我唔會干涉我老公點樣同A君相處，我認為佢應該要自己同A君媽媽協調。後來我識咗A君媽媽先知道，呢兩個成年人自好多年以嚟都完全溝通唔到，三句唔埋就鬧交，更何況離婚之後，所以我先嘗試出句聲

喺屋企，育兒嘅事一向都係我做主導。我花咗好多唇舌慢慢教育我老公，晚晚同佢pillow talk，佢一開始唔接受佢嘅方法好有問題。好彩我講嘅說話佢肯聽又肯消化，加上佢見到我對自己個仔雖然好嚴好firm（但溫柔），但係我哋關係非常親蜜，我唔需要點勞氣，仔仔都會聽教

佢慢慢發覺我個方法有效，又知道我冇偏心、一視同仁，明白我都只係為A君好，所以佢亦都嘗試用吓我嘅方法，學做一個及格爸爸。呢一兩年睇住佢有努力有進步，愈來愈識做得一個好爸爸，愈來愈識同兩位小朋友相處，亦肯接納意見。其實佢一直都錫小朋友，只不過係用錯晒方法

我哋曾經提出過接A君同我哋一齊住，不過可能佢十幾年嚟大部份時間一直都係由婆婆照顧，亦都習慣咗自由自在，故而A君要跟婆婆住。始終A君都已經十幾歲人，我哋都要尊重佢意願，唔可以迫佢搬過嚟。最重要係A君已經醒覺，我相信一切都會好起嚟

而A君親生媽媽嘅大話，我估佢會一直講到個仔十八歲，到時一句話A君成年，唔可以再用dependent身份移民，就可以bye bye你條尾

讀者投稿@Emily