#ParentLicenses1363

前幾日嘅經歷，令到我好唔開心之餘，仲質疑自己一直教自己小朋友嘅方法係唔係錯咗，希望各位家長可以善意提醒或者俾啲建議我，令我可以brainstorm一下自己往後教自己仔仔（3歲多，9月讀K1）嘅方法

我一直教仔仔要以禮待人、互相尊重、互相分享，當遇到有需要幫助嘅人，要主動去幫助人哋

久而久之，每當我仔仔出街見到路人個袋無拉好拉鏈，甩咗鞋帶，跌咗嘢，無帶口罩等等時，佢都會主動去提醒別人

我教佢要禮讓。出街時，無論去公園玩、買嘢，抑或去洗手間嘅時候，都一定要排隊

我教佢要識感恩同欣賞別人做嘅嘢。出街時，一旦仔仔見到司機叔叔、清潔姐姐、保安哥哥等等，佢都會同人哋講：「唔該XX，辛苦晒～拜拜」

直到有一次，我帶仔仔去海洋公園入面個威威公園，公園內條滑梯長期有好多小朋友排隊，而佢都好乖咁排隊

終於輪到佢嘅時候，佢就讓咗俾佢後面個妹妹，之後讓下一個……讓下又下一個，佢最後企咗喺隔離，等到無人瀡，佢先去瀡

我就問佢：「仔仔，做咩頭先輪到你唔瀡落嚟嘅？」

然後佢答我：「因為頭先後面個妹妹好baby（啱啱識行），我唔想佢企咁耐，我就俾佢玩先，然後個哥哥姐姐又好想玩，我就讓佢哋玩先，因為要禮讓，做個super boyboy！?」

我：「哦～原來係咁，你真係做得好好呀！好叻呀！?」

我續：「不過下次可以唔使讓晒啲小朋友玩晒你先玩㗎，因為個個小朋友一齊玩，咁大家先會開心㗎嘛，知道嗎？」

事後我將件事放咗喺個心度……

到啱啱個星期六，我哋去Toys”R”Us睇玩具。一入到去，仔仔就想去一架display嘅玩具貨車度玩（貨車入面又有?，又有滑梯個啲）

嗰時已經有兩個 K3至P1左右大嘅男仔喺貨車尾度玩緊。我仔仔就去車頭度玩，然後其中一個男仔A就撞開我仔話係佢玩緊。之後我仔見車尾無人玩，佢就過去玩。點知A又行過去，撞開我仔話佢要玩

我望一望男仔後面，佢媽媽只係望咗一望，就繼續撳電話

我就同仔仔講：「仔仔，不如我哋去睇其他玩具啦，因為媽咪好想睇其他玩具呀，不如你陪我去啦，好無？?」

仔仔：「但我真係好想玩呢架貨車，媽咪，我玩一分鐘就陪你去好唔好？?」

我：「唔好啦，而家咁多人玩緊，同埋你屋企都有部差唔多嘅車車，不如我哋行一陣，轉頭無咁多人先再玩啦，好無？?」

仔仔：「好啦?唔緊要啦，轉頭再玩啦?」

然後都行咗大約半個鐘左右，見到好多小朋友排緊隊等玩有個類似夾公仔機嘅玩具display。我仔仔都好想玩，我哋就排隊啦

排排下仔仔都有講話：「點解要排咁耐嘅，我排到好攰呀?」

我：「咁一係唔好玩，我哋出去坐下休息下啦?？」

仔仔：「唔好呀，我想玩呀?」

我：「好啦！咁媽咪give you a big hug！俾啲力量你啦?一齊繼續耐心咁排隊玩啦，好無？」

仔仔：「好呀?」

排咗都有20-30分鐘左右，差唔多到仔仔嗰時，其實仔仔好急想小便，不過佢都堅持住要玩埋先

終於輪到佢，佢啱啱喺個櫃桶仔度拎起個coins 入落去個窿度，支stick都未掂到，頭先個男仔A行咗埋嚟，又一嘢撞開咗我仔，然後話：「我幫你呀！」就霸住咗嚟玩

我仔用好渴望又唔開心嘅眼神望住個男仔A喺度玩，但佢都無出過聲。之後個男仔A夾完個扭蛋出嚟後，我就叫仔仔：「再入多次個coins，自己試下夾，唔使人幫」

個男仔A仍然keep住揸住支stick話要幫佢，佢媽媽又喺後面唔出聲咁撳電話

我終於忍唔住又控制住自己嘅怒火：「 多謝您呀！哥哥，不過你其實可以試下俾佢自己試下，唔係佢唔識玩㗎?」

但男仔A講咗幾次：「我幫佢啦！我幫佢啦！」

我即刻黑面，再用嚴肅少少嘅語氣同佢講：「 哥哥！不如你真係俾佢試下自己玩啦，因為佢排咗好耐隊㗎啦！如果你想玩不如去後面排隊啦?！」

然後A先去後面排隊……我其實都唔想幫人教仔，但如果帶個仔出街又全程撳電話唔理個仔嘅self behaviours ，不如你唔好生啦

其實我係咪用錯方法教錯個仔太善良、太禮讓，搞到佢唔識保衛一啲屬於佢自己嘅權利同埋自己想做嘅嘢呢？

?我好自責……究竟點樣先可以同時兩樣嘢都可以做到呢？有冇媽媽可以俾啲意見我??‍♀️??‍♀️

讀者投稿@惇