#ParentLicenses2359

我生於一家五口笨氏家庭，三姐弟中排行最大。爸爸偏心阿妹，但都錫細佬。媽媽最錫就係個細佬，全靠個仔佢先至有啲地位（喱句說話係老姑婆大姑姐講）

雖然我係女，但屋企有咩都搵我做，例如砌傢俬、教細嘅功課、幫細嘅做勞作、做家務等等。我爸喺我哋讀緊小學之時已開始包二奶，唔係好理我哋。我媽就唔識教，只識打罵

我一直都懷疑我係咪佢哋親生，以我記憶所及，只有我俾佢哋打得最「甘」，會掌摑我，會用掃把打我，力度足以將掃把打斷。我從來冇試過被學校或者鄰居投訴過，只係成日駁嘴，媽話我係頂心杉；細佬由小學開始成日喺學校搞事，要見家長，又會被鄰居投訴至追上門大鬧，但細佬反而冇俾佢哋打過（扮打唔計），最嚴厲都只係話細佬兩句，重好關心佢有冇被赫親

我爸試過喺我面前同人講我讀垃圾學校，但我間中學其實係band 2。細佬讀band 3中學又唔見佢同人講。三個仔女中得我讀到大學，我爸幫我交完註冊費，就話無幫我交學費，佢話女仔唔使讀咁多書。笨氏阿爸有田有地，令我申請唔到學生資助，所以我惟有靠幫人補習賺錢交學費，自己賺錢自己使，重夠錢去交流

相反，阿妹有阿爸嘅附屬咭。佢讀到中學有精神病，試過瘋狂購物，幾日就碌咗阿爸幾萬蚊。阿爸反倒鬧阿媽佢做咩碌咁多錢，隨即沒收咗佢張附屬卡，但只消一年半載就俾返佢用。阿妹讀唔到大學，阿爸就俾錢佢報出面啲證書課程，讀完一個又一個

我媽一直否認自己重男輕女、偏心，但事實並非如此

細佬讀中學嗰時話學校啲飯唔好食，阿媽日日送飯俾佢，重陪佢坐喺公園食。所以佢識唔到朋友，更可以話係無朋友。細佬無一份工做得長，每份工到最後都係話啲人對佢衰，又話壓力好大

細佬試過因迫車同人爭執，後來被警察拉咗，就叫我去差館保釋佢。佢又有試過刑事恐嚇，有警察上門搵佢。我媽問個警察會唔會打佢，重幫佢講說話，話佢返工壓力大先會咁

細佬屋企有時有KY、condom亂放，而且間中有全濕嘅泳褲（一定唔係去游水）。我會叫阿媽睇吓，阿媽會問細佬，但佢只回應「關你乜事」。阿媽同佢講放好啲，一陣又俾人話你（「人」意指係我）。再爆嘅係，細佬原來係變態，佢會去公廁（俗稱魚塘）搵獵物，同佢搞基，會book酒店房

細佬成日發夢做老闆，因而被傳銷公司騙咗十幾萬。重點係佢同阿媽屬聯名戶口。有時佢攞咗一大筆錢，阿媽問起，佢就答係攞嚟讀書

阿媽成日叫我要感激細佬俾屋我住，因為間屋遲早係佢。細佬幫手倒垃圾係好孝順表現，而我洗碗、拖地嗰啲就唔計——我媽講嘅

故事其實重有好多，不能盡錄

或者你哋會好好奇，點解我咁都唔搬走。其實我都試過有一次執好晒嘢，然後阿媽話：「你搬咗之後，以後就唔好再返嚟」。嗰一刻我好驚又心軟，以為佢係唔捨得我，所以最後我無離開到

直到而家喱一刻，我清楚知道佢只係唔捨得我啲錢，因為係我俾最多家用佢。現在，我準備會去一個地方重新生活，想斷絕同喱個家庭嘅來往，大家覺得絕嗎？

讀者投稿@笨氏家庭