#ParentLicenses2357

我曾經係一個未婚媽媽，喺讀中學時有咗BB

當時我同BB嘅爸爸（以下簡稱B爸）都係唔想生嘅，因為當時我哋異地戀緊，佢去咗外國讀書。耐何B爸嘅父母都想我生，而且說服咗我哋生落嚟

當初B爸嘅父母承諾會喺BB出生前安排我哋結婚，同話唔會影響到我學業，因為佢哋會安排補習俾我等等。我因為年少無知又驚，同埋唔知點面對父母，所以聽咗佢哋講，而且住咗喺佢哋屋企待產

直到我生咗個BB，佢哋所有嘅承諾都冇兌現到，我最後都要重讀，而且成年學業都荒廢咗

後來我同B爸分開咗，個BB一直係B爸父母照顧。當分開無耐時，就收到B爸父母電話，話要拎咗個撫養權，我想共同撫養都唔得。其後，因為爭撫養權問題而搞到大家關係勁惡劣，到最後我主動放棄

分開之後，我間唔中都有探吓個小朋友。B爸父母唔俾我帶個小朋友外出，每次探佢都一定要上佢哋屋企，過程俾人監視住咁探。每次探望都會俾B爸父母閒言閒語，刻意俾說話我聽，而且間接喺小朋友面前要我出醜，好讓小朋友睇唔起我。總之令我感覺好難受，所以之後我都冇再探望

時光飛逝，而家小朋友都中二中三了，我有成七八年都完全冇聯絡過佢，完全唔知佢近況。其實我都好矛盾，一直都想搵返個小朋友，但唔想同佢爺爺嫲嫲有任何聯絡，心底裡驚俾佢哋睇唔起，所以一直都唔敢搵。再者我唔知點面對個小朋友，我自己都活得唔太好，驚個小朋友嫌棄我

我自己都另外組織咗個家庭有個小朋友，而B爸同樣另外有家庭而且有另一個小朋友了。得悉B爸佢搬走咗，所以個小朋友一直係爺爺嫲嫲照顧同佢哋一齊住

我直到而家都係一個好失敗嘅母親，一直都唔知道應該要點做先係最好。我想偷偷地關注佢，但完全搵唔到佢Facebook、IG或者任何聯絡方法。我想大家俾吓意見，我應該繼續唔好打擾個小朋友嘅生活？因為我冇能力俾到任何嘢佢，即使見返我都唔可以為佢付出啲咩，而且都唔知佢想唔想見返我呢個冇用嘅生娘

圖片來源@十月初五的月光
讀者投稿@失敗的老母