#ParentLicenses2270

今日同屋企人喺酒樓食飯，自己食完無嘢做就睇下電話，睇睇下突然有兩個小學生走嚟我後面睇龍蝦

因為我張櫈後面就係魚缸，兩者之間其實真係只夠一個小朋友鬆動咁過，大人都要就住行，而我另一邊係無路出。就係咁，佢哋兩個攝咗去我後面睇龍蝦

睇都算，聲浪重要勁大聲勁興奮。我屋企人都有望下佢哋，我都覺得有啲煩，不過諗住見係細路仔就算啦，只係疑惑覺得成間酒樓咁大咁多地方可以睇，點解係要攝去我後面睇咁討厭呢

點知佢哋越睇越興奮，今次唔止嘈，開始郁手郁腳又行出行入，撞到我好多次。終於我忍唔到，但都仍然係好聲好氣咁同佢兩個講：「呀小朋友，你兩個好嘈，而且撞到我好多下啦！」

之後佢兩個你眼望我眼咁就走咗?

好啦，諗住可以靜靜地等屋企人食埋飯走，點知唔夠十分鐘佢兩條友又嚟，又係攝去我後面，講嘢係細聲咗，但一樣郁身郁勢又踎又企又出又入咁撞到我囉，佢哋真係好L忘我同好鐘意龍蝦

我真係有一刻想衝去佢老豆老母嗰枱去叫佢哋睇返住啲仔，但始終有老人家喺度，女女又喺隔離，我選擇癈事同人嘈，始終兩個細路都咁，大嘅都應該唔會好得好多?

最後佢哋個枱人走，個兩個細路都重睇緊。當時佢哋已經行返出少少睇，但都仍然喺我後面（所以我先影到相）。佢哋嗰家人更犀利，細路還細路睇，佢哋還佢哋走，互不相干咁

直到啲人走晒，一個疑似老豆嘅人先入返嚟叫佢兩個走。呢個老豆完全無覺得自己兩個仔企喺度踎喺度咁近人哋喺度睇嘢會騷擾到人

最後我哋走時，我同老公喺度呻之餘，我女都同我講：「兩個哥哥好嘈，重撞到我，同埋咁樣整到人係唔啱」

我心諗：我女幼稚園都知咁樣唔好，兩個小學嘅都唔識，啲父母真係唔該考牌呀！

圖片來源@我想靜靜
讀者投稿@我想靜靜