#ParentLicenses2267

我哋同小朋友去咗將軍澳東港城嘅彈彈床玩，去到已經見到有個好高嘅男人玩得好忘我，除咗係咁插隊爭玩某個玩樂設施外，而且同佢對仔女（目測八到十歲）係咁喺彈彈床裡面奔跑，重要係高速狂奔。在場都有唔少好細嘅小朋友，但佢哋完全冇理

直到接近完場前八分鐘左右，我小朋友玩緊滑梯，同時呢個男人同佢個仔追逐緊，突然衝上滑梯就咁跑過去，而當時我小朋友滑緊落嚟，差啲踩到佢隻手

我哋即刻搵個男人講，點知佢重要話：「我冇掂到佢喎，呢啲場係咁玩㗎啦」

見佢完全唔覺得自己有問題，我哋唯有即刻同在場職員講。職員聽到後都話：「呢啲設施係俾小朋友玩嘅」

當時有兩個職員都即刻入去搵個男人講叫佢小心啲，但當然個男人係冇理，因為佢覺得自己冇錯，職員都搖搖頭表示好難做

我哋同職員對話嘅時候，隔籬都有個媽媽聽到都忍唔住出聲話呢個男人係咁喺場內追逐。呢啲場設計主要俾小朋友玩，唔係話唔俾你玩，但同場咁多小朋友，都唔係咁誇張玩到咁忘我啩？

最後有段小插曲：有某啲設施要排隊，當時我哋排緊隊，見有對姐弟突然企喺我前面，我都好禮貌叫佢哋喺後面排隊，點知佢哋講大話同我講佢係排緊，但係我明明睇住佢哋插隊。我見係小朋友所以都冇出聲由佢哋玩先，到後來先知原來呢對姐弟就係個男人嘅仔女

讀者投稿@媽媽