#ParentLicenses2165

前幾日帶小朋友去一個普通話朗誦比賽，地點係中環大會堂某個演奏廳，參賽者要按大會嘅次序逐一企喺評判面前朗讀自己嘅誦材

由於參加比賽嘅小朋友都係得幾歲嘅幼稚園人仔，大家都唔會期望比賽場地真係好似聽演奏會咁安靜，但至少我見大部份家長都會教小朋友要盡量安靜、坐定定，著小朋友們要尊重其他嘅參賽者

惟其中一位爸爸竟然喺自己個仔比賽完後嗰1秒，係1秒呀！佢就叫個老婆喺袋裏面攞一份大禮物出嚟，即場叫個仔拆開嚟玩

相信正常人都知道，一個只有三四歲嘅小朋友見到玩具係可以會幾咁興奮。個仔每隔兩秒就大聲問佢老竇：「係咪咁玩㗎？」又好大力咁拍打個玩具盒同埋佢份玩具

至於身邊嘅阿媽好似唔識佢哋父子咁，全程一粒聲無出過，連一個眼神都無望過佢哋；而個老竇，竟然同個仔一樣咁興奮，係咁分享個玩具要點樣點樣玩，完全無視其他參賽者重未朗誦完

場地負責人（其實係三四個中年、好柔弱好斯文嘅女士）去到中段忍唔住講咗兩句：「想提醒大家家長同小朋友要保持安靜」咁當然佢兩父子完全唔理所有規矩，繼續投入佢哋嘅玩具世界。在座嘅其他家長都忍唔住眼望望，但相信大家都為咗避免影響小朋友表演嘅心情，都盡量忍住唔出聲

直到個比賽（終於）完咗，個老竇再次大大聲讚自己個仔：「你今日真係做得好叻呀」然後大搖大擺攞住份玩具離場

真係非常出色嘅自私精身教啊🙃

讀者投稿@最憎自私精