#ParentLicenses2161

我遇過兩件事，兩者都係關於呀媽帶住自己小朋友喺街亂咁批評人

事件發生嗰時我都係讀緊中學，所以當時嘅我都係隨得佢哋點講就點講，完全唔敢出聲。直到最近見到呢個page，就想分享一下

事件一

有日我要落一落街，手上連袋都冇個，喺大廈走出嚟先知落緊雨。嗰時諗住好快就會入返室內，同埋我細個唔怕淋雨，所以冇返轉頭拎遮

正當我等緊過馬路，有對母女（個女大約6歲）行過我後面，當時條街得我同佢哋。個呀媽無啦啦望住我，再用有骨嘅語氣同呀女講：「你記住唔好學呢啲人，有遮都特登唔開呀，自己攞嚟病！」

佢呀媽個語氣肯定到我以為自己帶咗遮但我自己都唔知，之後確定我真係咩都冇拎落樓我就過馬路走咗

然而，我再諗深一層，佢做咩無啦啦喺個女面前屈人有遮都特登唔開遮呢😂

事件二

我有一排整親膝頭，雖然行到平路，但上落樓梯同斜路都會痛

有日喺地鐵搭𨋢，我著緊長褲，外觀上睇到係正常，但其實我膝頭係腫咗。嗰日好多人，我前面入咗一對男女加推住架BB車，之後我係最後一個入𨋢

當時𨋢內空間夠位俾我企，只係需要佢哋架車要行入少少，點知一關門，個呀媽就喺度鬧：「好心你好人好姐就唔好搭𨋢啦，阻住晒」

之後我都唔記得佢鬧咩，只記得佢係由入𨋢鬧到出𨋢，佢老公想制止又唔太敢出聲。其實你唔想同人逼，入𨋢嗰時排優先嗰條隊就得，何況有時人哋嘅需要真係唔會喺表面就睇得出，請你哋唔好隨便下定論。另外就算BB聽唔明，但我相信佢都會感覺到大人嘅負面情緒，咁樣真係好咩？

希望大家帶住小朋友時唔好用有色眼鏡睇人、擅自妄下判斷，就算想用見到嘅嘢教女，都唔好直接喺人哋面前批評人，咁樣係好冇禮貌，仔女學咗就唔好啦！

讀者投稿@能屈不能伸