#ParentLicenses2158

最近見到某位藝人家長以長文講述照顧高敏兒童嘅難處，我閱後有感而發，因為所謂面對嘅「難處」係往往都會有不明所以嘅家長站在道德高地，去批評我哋唔識教小朋友，又或要公審我哋小朋友嘅行為

我的三歲小朋友屬高敏兒童，佢會因為一隻襪嘅車線位係唔係對準佢啲腳趾、個水樽唔同咗樣，唔係用開嗰個、搭車有陌生人坐佢隔離等等的事情，而引發佢有脾氣及不安嘅情緒

佢最常用係尖叫同埋哭喊嘅方式去表達佢嘅投訴，喺好多人眼中無關痛癢嘅小事佢哋都會非常咁在意，而且無論你用咩方法，軟硬兼施都係唔會控制到佢，因為佢哋嘅「堅持」係你哋想像唔到，如果唔係唔會有藝人家長所講嘅non-stop喊十五個鐘嘅例子，我小朋友閒閒地都三個鐘起跳！

有啲人又會話：「咁點解你唔就佢，佢要咩就俾咩佢，唔好俾佢大庭廣眾撒野爆喊」

咁我都會反問：「唔通佢要求嘅嘢係錯都要俾？例如佢想要把刀去斬人都容許？」當然，小朋友而家重細，未有咁嚴重

然而我舉個簡單例子，從我小朋友好細個開始就對於「時裝」呢家嘢有自己一套想法。自從要返幼稚園，自拎到套校服開始，佢就由心到身完全拒絕。我理解唔到係因為套校服唔夠靚定係因為佢要同人哋著一樣嘅衫所以咁抗拒，當然佢都解釋唔到俾你知係點解，但總之要換衫返學就猶如打杖般，口水鼻涕咩都齊。難道我要因為個小朋友咁樣爆喊住返學，所以就容許佢著便服或者叫校長格外開恩？

例子重有好多，我知佢哋作出抗議嘅行為好古怪，亦都唔一一細數。只係同小朋友出街特別有壓力，耐唔耐就會因為小朋友某啲行為而被其他家長當面話唔識教仔，我都一一只能沉默面對，我都覺得佢哋某一方面係講得啱嘅

面對高敏小朋友我真係無從入手，唔知從邊度教起，雖然孩子屬高敏唔係一個藉口，但仍然都想同各位兜口兜面同我講「你識唔識教仔㗎？」「好心你睇住個仔啦！」嘅家長講：「家家有本難念的經，如果你咁好彩小朋友喊五分鐘就收聲，又或是你氹下佢轉頭買杯雪糕俾佢食就妥協，真係好羨慕你。我理解你因為未經歷過所以唔明白，但希望你說話可以留有餘地，因為我哋背後付出嘅努力不比你少，只係未搵到正確方法去教育高需求嘅小朋友，你嘅一句「唔識教仔」會令我哋最後一道防線崩潰和無比自責

有得揀的話，唔通我唔想考好個牌？難道被人話「唔識教」個心會舒服咩？

讀者投稿@想考好個牌既媽媽