#ParentLicenses2040

昨日跟五歲女兒到playhouse玩，其中一個遊戲是放波波球到槍裡，然後按掣發射

然而，波波球需要自己到下層執，我女兒第一次自己上去。未幾，阿女哭住返來同我講：「佢哋唔俾我玩」

我都馬上問佢：「咁你有冇排隊？有冇耐心等候？佢哋射完手上的波波就會到你啦」

但阿女都係話：「我有排隊，但佢哋唔俾我玩」

然後我就同阿女一齊上去

上面有兩部射波槍，我哋去其中一部，只有一個三歲左右的妹妹在玩，佢係冇波波球的，而佢媽媽喺隔離玩緊電話

我哋行埋去，第一時間問：「妹妹你玩完未？」

妹妹點頭，我再問：「可以俾姐姐玩一陣嗎？」

妹妹又點頭，但佢一直唔行開兼按住發射掣，妹妹嘅媽媽馬上講要一齊玩

好，冇問題，一齊玩。我女就入咗三至四個波波，但個妹妹一直按住發射掣，但其實我女都好想按發射掣，於是我就拉開我女，再問妹妹：「你冇波波球，可以先俾姐姐玩嗎？佢都好想按掣呀！」

呢個媽媽先一邊拉開佢個女，一邊講：「佢哋唔分享呀，你過來啦！」

呢句說話重複咗三次，先拉開佢個女。呢下我聽到都覺得怪怪的，咩係我哋唔分享？但我冇回應佢

到下一round，我哋再落去執波波，再上返去玩，呢次我哋去另一部機玩。當時部機冇人玩緊，我女一跑過去，後面隨即有三個男童跑過來爭住講：「係我哋玩緊㗎！我哋玩緊㗎！」

我：「但係我個女行過來先，你哋排隊啦！」

點知剛才嗰個媽媽走過來拉走嗰三個男童，再一邊講：「佢哋唔分享㗎，你哋來呢邊玩啦，一齊玩係咪開心啲呀？」

我唔知佢哋係咪認識，但只見男童只係入波波，佢女一直按掣

直到第三次我哋再落去執波上來，呢次我女又去返呢對母女嗰邊。個媽媽又拉開佢個女，再說：「佢哋唔分享㗎，我哋一陣先玩啦！」

呢次我真係忍唔住爆佢：「咩係『我哋唔分享』？我哋又唔識你，一定要同你分享咩？小朋友識自己選擇同咩人一齊玩，佢唔想同你玩咪唔同你玩囉，做咩一直強調係『我哋唔分享』？」

個媽媽一直冇出聲，我哋玩緊時，聽到佢默默同佢個女講：「去玩其他嘢好嗎？你已經喺度玩咗半句鐘啦……」

平時我哋帶玩具，例如泡泡槍、滑板車到公園玩，都會有小朋友過來問可唔可以借俾佢，我都係會問返我個女想唔想借，因為玩具係佢嘅，佢有權選擇借俾咩人玩，唔係分唔分享嘅問題囉

李嘉誠夠有錢啦，唔通又話佢唔分享呀？老奉一定要同你分享咩！

而上述媽媽講嘅「分享」，只係想人哋落去執波波，再俾你個女玩，咁算咩分享？on9

讀者投稿@我都係做人阿媽