#ParentLicenses1940

就 #ParentLicenses1937 嘅個案，我好想講：「我好明白，you are not alone！」

延伸閱讀 👉🏻 #ParentLicenses1937 https://parentlicenses.hk/?p=3127

雖然我嘅情況同 #ParentLicenses1937 嘅樓主並唔完全相同，但我因為原生家庭嘅問題而患有抑鬱症，要長期食抗抑鬱藥。精神科姑娘話咁多年嘅原生家庭問題所引起嘅病，好難完全斷尾，叫我一有情況一定要搵人幫忙🥹

我細個嗰陣，俾我親生嘅爸爸性侵一段頗長嘅時間，但嗰時好怕俾人打，都唔係好敢同人講。到有一次我真係諗唔明白，我同咗媽媽講，但媽媽嘅反應係好惡：「點會呀？！今晚俾埋我半邊床你同佢瞓囉！」

我當時心諗：可能屋企人得爸爸一個搵錢養家，媽媽本身都有好多問題，就一直因為咁而忍讓佢。之後我更加唔敢同屋企人講

到我大個咗有自己一頭家，自己係一個女嘅媽媽，我更加唔明白點解可以有咁嘅事發生。但係，唔發生都發生咗，我只係想好好保護我個女

早幾年，我女當時得歲幾，我就同媽媽講：「我唔希望個女同爸爸獨處」

但媽媽就話：「咁我都要落街買餸㗎！」

及後，就佢哋兩個同埋個女一齊落去買餸。買買吓，我爸帶咗佢去第二度，話去咗超級市場，重俾佢喺地下行（冇著鞋）。另外重有一次，全屋人都喺廳開緊冷氣，唔知做咩佢要無啦啦單獨抱佢入房，我就即刻入去帶返個女出嚟

嗰次之後，我搵到一個機會得3個人時，好平心靜氣咁再講一下我自己嘅訴求：「我真係唔想個女受到我以前曾經受過嘅傷害，我唔想介定幾多歲開始要小心，我希望爸爸同女唔好再獨處」

點知，嗰個所謂嘅爸爸立即大發雷霆：「你係咪當我係危險人物？！」

媽媽就話：「咁耐之前嘅事重提嚟做咩？！你當佢係禽獸？」

……當下，我直頭係崩潰。咩料？佢唔通唔係咩？ 唔通我係抵死嘅？

我問返佢：「咁樣係咪正常，唔通公公（已故）都係咁對你？」

佢就更加發癲話：「你好拎死人嚟講！」

件事繼續發酵，我細佬問我做咩喺度「攪事」？我咁多年都冇同佢講，我就係唔想佢擔心，但原來我嘅擔心好多餘

我講咗俾細佬知之後，佢就話：「都咁多年啦，你想點丫？報警都冇證據，你唔會告得入佢，你唔好再攪事影響我哋一家人嘅生活啦，你咁驚就唔好返嚟啦」

真心，心跌咗落冰點，咁我唯有唔返去啦……但之後媽媽又問我做咩唔返去：「你以前離家出走，屋企人都原諒你，點解你唔可以原諒返屋企人？」

我：「兩件事點可以相提並論？一個係錯嘅程度係刑事，犯法㗎！要坐監㗎！而且我唔影響你哋一家人嘅生活啦！」

媽：「屋企人嘅悔氣說話點解咁上心？」

我黑人問號，一個悔氣說話可以講嘢完全唔使負責任？

呢件事令我之後經常半夜發夢起身不停喊，就算返緊工有小小事就突然喊，一喊就停唔到，可以喊半日。而我老公夜晚有要求時，我突然大喊大叫話唔好，失控咗

再之後，我時不時突然無故心跳、手震、出汗、頭暈、呼吸困難。我去睇醫生，檢查過生理嘅情況都一切正常。醫生問我有冇咩特別突發事情發生，事實又冇，因為唔係突發，醫生就建議我轉介去精神科

喺重排緊見醫生時，好好彩有個好好嘅精神科護士一路跟進住，問咗好多嘢，之後推斷應該係關原生家庭的事

佢知道情況之後同我講：「中國人思想係要孝順，明白你會好矛盾，但首要係唔好影響到你自己同而家嘅屋企人先。因為你而家除咗係佢哋嘅女同家姐，你重係人哋嘅老婆同媽媽。你生活得唔好，受最大影響嘅係你老公同個女，咁就會多一個唔幸福嘅家庭。最緊要係老公都體諒你，個女健康快樂成長」

護士續道：「你唔好望返轉頭住，同原生家庭斷一斷，令自己可以行埋之後嘅路」

我之所以分享，係想勉勵曾經因為原生家庭而受過傷害嘅爸爸媽媽，一齊努力向前望，因為我哋就係我哋小朋友嘅福祉，唔好將傷痛帶俾下一代，共勉之💪🏻加油❣️

讀者投稿@一個只想保護女兒嘅媽媽