#ParentLicenses1401

今日喺西鐵，有一父母帶住兩個約4至6歲嘅年幼子女上車

當時我坐梗張櫈嘅最左邊，仲剩低一個位（西鐵位無分格，但坐開都知係可以坐到4個人）。佢哋一見到，就意圖夾硬逼晒兩個細路落嚟嗰謹剩餘嘅一個座位。

首先，個阿媽安排擺低家姐先，著佢坐喺近我少少嘅位。家姐一坐低，佢條馬尾就揈嚟揈去，下下拍到我應一應

啪啪聲嘅呢個時候，個阿媽又想塞埋細佬坐埋落嚟，但就塞極都極唔到。由於點都係差少少，家姐就為咗有多啲位，個pat pat就係咁向我嗰邊頂

其實我隔離本身呢個吉位，俾一個成年人坐一定綽綽有餘，而我同隔離嗰個男人亦係正常身距。如果我再坐埋啲，咁我嗰隻手臂就同佢個手臂貼到實一實㗎喇🙂

明顯地，以上所講嘅呢家人完全無考慮過，家姐個pat pat仍然孜孜不倦係咁撞到我大髀，但係我依然一步都唔郁，我亦無出聲，全程目無表情地望住佢哋老豆

過咗陣，唔知係佢sense到定係覺得無結果，所以叫晒佢哋全部人起身唔好坐呢度。而卒之，到咗下個站，佢哋都終於得償所願，搵到一人一個位坐

其實呢啲事都唔係第一次發生，究竟啲家長係真心覺得夠位坐，定係想逼到已經坐喺隔離嗰個人起身，讓多一個位俾佢另一個小朋友？

文章來源：讀者投稿@逼逼逼