#ParentLicenses1879

呢排咁多人講「巨嬰」同自理能力，我想分享下我前度同佢家姐嘅故事

前度當時20幾歲，佢家姐30歲頭。佢兩個由細到大都唔使做家務，所有嘢都係阿媽攬晒嚟做

初頭拍拖半年，佢帶我上佢屋企見家長食餐飯。由開飯前到食完飯，佢兩姊弟除咗食飯，基本上都係一碌木咁坐喺間房度做自己嘢等開飯。煮好飯又唔幫手出嚟端啲餸，食完飯又唔執枱，始終我係外人，禮貌上，嚟食飯咪問下有咩可以幫下手

我前度就話：「唔使幫啦，由佢搞，喺度等就得㗎啦」

聽落好似有少少道理，或者可能驚我整亂張飯枱，所以我淨係幫手執枱，執枱唔會亂啦掛？啲碗碟餐具都係放鋅盤，即棄枱布車落垃圾桶就係

自此之後，我每次上嚟食飯都幫手執枱，熟咗就幫手裝飯同端餸，然而我冇一次係見到佢兩姊弟會幫手做呢啲嘢，講緊係連裝飯都要阿媽裝

有一年佢阿爸阿媽去歐洲玩，要個幾星期先返嚟，我喺第四日上佢屋企hea

一入屋，我就見到鋅盤係擺滿晒污糟碗碟，實在頂唔順呢個場面，我忍唔住洗晒啲碗佢。細問之下，原來佢兩個係唔識洗碗，話等阿爸阿媽返嚟洗

Oh my god……我心諗：如果你阿爸阿媽返唔到嚟或者有咩事，咁點算？

路過佢阿爸阿媽間房，淨係見到張床有座曬好拎返上嚟嘅「衣服山」。如果全部都係佢阿爸阿媽啲衫，都情有可原，可能姊弟倆唔知爸媽啲衫點放。但我想講，係全家人嘅衫喺晒度，原來又係等屋企人返嚟摺衫

衫褲底衫褲唔識自己買要阿媽買、唔識用微波爐、攤大手板問屋企人拎錢等等，重有好多騎呢嘢數之不盡

唔好問我同佢一齊咗幾多年，其實我好後悔浪費咗咁多光陰喺呢個人身上，真係只能夠怪自己冇帶眼識人，鬼叫我咁少拍拖經驗俾人昆咗，不過而家我有新生活，有個成熟穩重嘅另一半，就算啦

我想喺度帶出嘅信息——各位父母，如果你好似以上呢兩姊弟個阿媽咁，事事都要攬晒所有嘢去做，用盡一切方法保護佢哋，想佢哋行條無風無雨嘅平坦路，可能喺呢刻你覺得小朋友重細，覺得呢啲好小事，但長遠嚟講只會害咗佢，只係你覺得未燒到埋嚟而已

讀者投稿@慈母多敗兒