#ParentLicenses1841

睇到 #ParentLicenses1837 嘅分享，令我忽然回想起中學時代嘅一件事

想當年我啱啱升上中一，同學仔都好鍾意畫畫，經常會互相畫喺隔離位嘅書簿。咁當然唔會遮住課文內容，都會揀空白地方嘅

嗰時，我有個份人好隨和嘅坐我隔離位，佢一向都冇話介意我哋畫花佢啲書，連佢自己都有畫

聽啲識佢好耐嘅同學仔講，佢有個青梅竹馬嘅男仔同佢一齊長大，所以同學仔時不時都會開玩笑式咁抽下水（你知啦，青春期都係鍾意傾情情塔塔嘅主題)，而佢每次都會係笑笑口半認半唔認咁

話說，有次派返份測驗卷，貪玩嘅我就喺隔離位份卷背面空白地方寫咗啲字，畫咗個心咁

不過老實講唔知有冇記錯，畢竟事隔多年，反正就係暗示邊個同邊個拍拖咁上下。當時隔離位都係繼續微笑應對

然而，有日我返到屋企，收到有個電話打嚟搵我，原來係隔離位嘅媽媽

佢喺電話鬧我畫花晒份卷，話要留返俾妹妹讀，好惡咁鬧咗我幾個字

咁我都知自己多手，喊晒口講對唔住，但佢都繼續鬧我。咁啱當時父母都唔喺屋企，我又唔敢cut線，唯有硬食

收線之後，我都繼續驚到爆喊，再有電話都唔敢聽。直至爸爸返嚟，我先講返成件事佢知

爸爸安撫完我就打返俾果位家長解釋，同叫我返學校向同學親口講對唔住

雖然我到而家都唔知佢媽咪咁嬲，係因為我畫花咗份卷，定係因為我暗示佢囡拍拖，但我深深體會到俾人鬧到狗血淋頭而又孤立無援時係幾咁傍徨同無助

剛上初中嘅中學雞尚且如此，更何況再細啲嘅小朋友。父母緊張自己仔女係正常不過，但炳人鑊甘之前，係咪都要睇返當事人年齡同事件嚴重性？如果唔係牽涉到人命傷亡，人哋都道咗歉就無謂咄咄逼人啦！

P.S.：隔離位最後同青梅竹馬拉埋天窗

圖片來源@那些年，我們一起追的女孩
讀者投稿@中學雞