#ParentLicenses1768

睇完你個post，我深感同情你，真係唔明點解而家啲呀媽咁樣教細路，我細個隻手咁多，一早俾呀媽「教導」咗十年，邊有可能仲周圍摸

（延伸閱讀：https://parentlicenses.hk/?p=2075）

上幾個post都見到細路周圍摸嘅post，有人話要明白細路成長階段，我明，我都讀兒童心理出身；但明還明，有時真係局內人先知，佢周圍摸呢個行為係想認知感受事物，定想刷存在感，抑或堅係曳囉

呀黑仔導師，我明白，我之前都試過同細路補習，個呀媽嘅情況同你差唔多，又係有錢人變普通百姓，而個細路又係咁多手。嗰時，每當個細路落堂，我都有同佢呀媽講佢小朋友每次上堂嘅情況，不過就好唔明點解個呀媽唔信

容我分享下我嘅經歷，嗰次經歷我真係覺得生仔前要考牌，生完唔該繼續考多次牌

小朋友讀緊小三，個媽媽又係聲稱從一所名牌補習社過嚟屋村補習社的。講明先，佢係日日上嗰隻嘅補習班

上了3堂，每次都覺得個細路底子好差，連ABC仲未背到，寫又寫錯晒，叫佢寫ABCDE，佢都寫成ABCCD。我冇怪佢，只覺得會唔會係讀寫障礙嗰啲，所以我每次都有同呀媽講返進度，同解釋返溫習進度問題，而每次個呀媽聽完後都實搬出一大堆解釋

重點其實個仔全程喺度，個呀媽就會話個仔好正常，無讀寫障礙；又話之前跟名師補過，只係因為搬屋，所以先無再補，更成日喺我面前講以前導師有幾好

有幾好？例如佢會話以前嗰間溫一頁書好快，一堂可以溫幾版。然後就質疑而家點解用兩堂時間都溫唔晒中英背默範圍，係接受唔到，係拖佢進度
.
我問佢：「咁以前小朋友小學幾年級先？」

佢話：「K3囉」

嘩，我即刻黑人問號咗啦，你用「幼稚園補習」同而家「小三要背默」嚟同我比較進度？！唔係嘛！

我好老實同佢講：「小朋友點解連ABCDE都可以寫錯，我當佢背得出，都要寫得正確，唔係背完默唔返出嚟，咁有咩意思？」

小朋友即衝過嚟大聲講：「我專登寫錯㗎，我玩下你咋」

我即話：「咁你而家寫俾我睇」

呀媽即時插話：「個仔無理由唔識，佢平時睇YouTube都係聽英文」

吓？聽英文？有邊個唔識？有耳仔都識聽，佢明唔明先得㗎？！而當然個細路係唔肯寫啦，骨子裡我好肯定佢唔係扮嘢，係堅唔識

我做補習嗰度，一旦老細收到嘅學生屬於讀寫障礙，一定交俾我教，所以我起碼識分，除非佢嚴重到超越我認知範圍以外啦

不過我又衰多口嘅（我認衰，唔好插我 ），我就話：「咁我唔知點解佢要扮嘢」

當時佢個細路仲周圍搞嘢，我見reception小姐已經好似保鏢咁跟住佢。佢係就係周圍搞緊嘢，不過都周不時會望下我講咩

呀媽即刻回擊：「其實我想投訴你好耐，我對你好失望。你成日唔理佢，你梗唔知啦，你有望住佢，點會唔知丫？！呀仔有同我講你成堂無理佢，掛住做自己嘢，所有嘢係佢自已想辦法解決！」

聽到呢度我火都嚟埋，當時係預咗俾老細炒魷都在所不惜要出聲

我即刻話：「我一堂唔係一對一，我仲有其他小朋友一齊上，同埋我點無理佢？我冇理佢，佢會做到功課，背到少少書？我冇理佢，我會知佢連ABC都錯？我冇理佢咩呀？你問下你小朋友，上次數學佢計極都唔識，最後我點教佢，你有無問過佢？」

個呀媽好堅持話係細路自己搞掂，個細路又衝過嚟同我講：「我自己睇明咋，你冇教我，我自己學咋」

同場我仲有同事一齊，有証有據，佢都要屈我

因為佢仲有堂未上，我就話：「一係轉老師，一係俾返其餘堂數錢你，因為我教法唔啱你；一係你試下隔離間補習社，人哋話好好，你去隔離補啦。唔好意思，阻你寶貴時間」

話畢我入返房，叫個reception小姐搞掂佢

我唔明點可以教到個細路咁大話，個呀媽又真係信。生仔前係咪要考牌，睇下自己適唔適合教仔，唔好危害下一代。而已身教好重要，家長而家咩態度，你個細路將來就係你咁樣

我好多謝以前老闆嘅體諒，佢無炒我之餘，仲安慰我。我更加要多謝呢位家長，嗰次老闆知道件事後，請我哋成班導師食好嘢，真係多謝你

所以，呀黑仔導師，你咁嘅情況，不如你嘗試每次上堂後都同家長講一講，唔好忍，如果佢個仔真係多手唔聽話，而佢呀媽又唔信，下個月唔好收佢啦

如果你係打份工，老細會明㗎，我撐你，加油，疫症期間有學生係好事，但若果忍咗一個月都係咁，就唔好再忍了

祝好運

讀者投稿@心感同情黑仔導師