#ParentLicenses1721

成日見人分享啲呀媽呀爸唔識教仔，我想分享返今日所見所聞，讚下啲好有家教嘅家長，唔知可唔可以？

見好天就去西貢放狗，我隻狗狗係見到其他狗都會走埋去聞下，我有上繩，但狗狗都會拉住我去聞其他狗狗

有個目測5, 6歲嘅小妹妹拖住狗仔坐喺樓梯度，而佢個應該7, 8歲家姐同家長都坐喺隔離

我隻狗拉住我，想去聞佢哋隻狗，但我驚嚇親小朋友，所以我拉實我隻狗。點知個家姐即刻由樓梯跑落嚟，好大方咁問我：「隻狗係咪做朋友呀？」

我話：「係呀」

家姐拉佢妹手上隻狗同我隻狗對聞，家姐仲好可愛咁講：「佢哋做朋友呀😊」

當時佢家長係一句聲都冇出，由得囡囡處理，可見父母教導有方，囡囡大方得體又勇敢，讚！

其後，行行下又見到有一個3, 4歲嘅小朋喺樹下執石仔亂扔。起初佢父母冇阻止，但見我隻狗同另一隻狗喺側邊對聞緊時，佢媽媽即刻溫柔阻止話：「唔好扔啦，你見唔見到狗仔喺度玩緊，會扔到狗仔㗎，佢地會痛㗎」

仔仔即刻停手，好專心咁望住兩隻狗喺度互聞，帶出：玩可以，但唔好傷害到小動物，讚

最後，就係我哋去狗狗友善餐廳食飯，隔離坐咗個要BB櫈嘅小朋友自己食飯，應該3, 4歲，見到我隻狗狗即刻say hello🤣

我禮貌咁回覆：「Hello」

小朋友全程望住我隻狗，但冇伸手去摸。隔咗一陣佢問我：「姐姐，可唔可以摸摸🐈」

佢媽咪就即刻阻止話：「姐姐食緊飯，唔好騷擾姐姐」

我即刻話：「唔緊要，可以摸下，佢好乖唔咬人㗎」

小朋友好溫柔咁摸咗我隻狗兩下，然後好開心咁一路哼歌，一路食飯，超可愛，好少有咁細嘅小朋友識問可唔可以摸，通常直接行埋嚟就摸或者嚇到彈開，應該係佢喺屋企時父母都有教要經人同意先可以做某啲行為

三位小朋友好可愛，而且好有愛，有教養嘅小朋友其實都好多㗎，唔好只係留意啲負面嘢，互相包容下，大家都開心

讀者投稿@Happy