#ParentLicenses1684

做人父母，應該唔單止要考牌，除咗要識點樣照顧小朋友外，仲要有公德心

我樓上住咗有兩個小朋友嘅家庭，唔知佢哋父母係咪住喺度，但就肯定有工人姐姐，應該平時都係靠工人姐姐照顧

樓上兩位小朋友由早上8點幾就開始玩，一係不停跑不停跳，一係就坐車玩，發出啲類似拉櫈嘅聲音，只會直到喺下午佢哋瞓晏覺嘅時候先會冇咗噪音

呢啲拉櫈聲同埋跑跳聲係會響到我成間屋都震。你可能會諗我有冇誇大其詞，點解會咁應聲？實情係呢棟樓嘅隔音真係差，樓層與樓層之間應該真係薄，如果樓上鋪地板嘅工夫唔夠好就一定好應聲，而且單位同單位之間嘅牆係可以薄到連隔離單位熄燈開燈嘅聲都聽得好清楚

可想而之，當樓上兩位小朋友有咁嘅情況嘅時候，適逢疫情仲要長期在家工作，我哋喺樓下真係覺得好煩、好折磨??‍♀️??‍♀️??‍♀️

小朋友會跑會跳會玩都好正常，我仲好鼓勵小朋友應該要有咁嘅童年！我好多親戚都有小朋友，去佢哋屋企都會見到有鋪設厚play mat，甚至屋企走廊都會有一層薄墊

我樓上嗰家人肯定就冇咁樣做到！我嘗試同管理處投訴咗好多次，都係完全冇改善，佢哋作為父母明知有兩個小朋友，會一齊玩一齊癲，係咪應該要鋪返墊喺地下呢？點解要將小朋友嘅快樂建立喺我哋嘅痛苦之上呢？你哋咁冇公德心係如何為人父母？點樣教自己嘅小朋友呀？

每次自己遇到呢啲事，除咗自己唔開心之外，都會記低自己遇到過呢啲咁不快嘅事，作為日後養育子女嘅借鑑，因為「己所不欲，勿施於人」

圖片來源@新浪
讀者投稿@勿施於人