#ParentLicenses1615

我一直都好唔鍾意啲人話生多個嘅原因係因為想有個細嘅陪個大嘅，等而家大嗰個冇咁悶，而我覺得呢個理由係最偏心嘅一個理由

當年第一個小朋友出世嘅時候，就好似天使咁萬般寵愛在一身，所有嘢都好完美、好得意。但輪到個細嘅出現只係為咗陪個「天使」，細嘅一切所有嘢都唔會再咁上心，亦都冇咁得意、冇咁可愛

我——就係呢個原因而出世嘅受害者，所以我對呢一句說話十分反感

咁多年嚟，我爸媽都係偏心偏到出晒面。細個嗰陣就咩都就晒我家姐，成日開口埋口讚佢叻，成日叫我「學下家姐啦」。到大咗後，我試舉一個簡單例子

出嚟做嘢之後，如果家姐加班到預計9點先返到嚟，打嚟話留飯，佢兩老就一定會等埋佢先至食晚飯，然後會叫我自己食先，佢兩老等埋家姐先食，原因係會講埋出口「唔想家姐自己一個食飯」。然後家姐返到嚟仲好似皇帝咁坐喺度，咩都唔使做，亦唔使幫手開枱，嘢飲兩老會叫我幫手攞畀家姐，原因係「家姐返工攰」

但當調返轉我預計要加班到9點先返到屋企，我話要留飯，佢兩老係會同家姐食飯先，然後我返到嚟自己食，自己執枱，自己照顧返自己，因為話唔得閒理我，因為佢哋喺度切緊生果或者整緊甜品俾我家姐??‍♂️

甚至到我而家有個女，當我個女有啲咩叻嘅嘢、好嘅嘢，兩老竟然可以話係似我家姐

聽到呢句嘢之後，我老婆超級嬲，而我亦都覺得嬲得好合理。個女係我同我老婆生，我老婆話：「有啲好嘅嘢話似你，都會開心，都會覺得合理。但一有啲好嘅嘢、讚嘅嘢就話似你家姐，咁就好唔合理。都唔知咩邏輯，唔講以為係佢生嘅」

最後希望所有家長倘若已有一個小朋友，而又諗緊生唔生第二個（作為受害者嘅我絕對唔會諗呢個問題?），但你嘅原因係想個大嘅有人陪，等佢冇咁悶，你哋真係要考慮清楚，呢個咁偏心嘅諗法係會令細嗰個往後嘅生活都有一啲小陰影

不過，如果想生第二個嘅原因係本身你哋都好鍾意小朋友或者你哋都好鍾意個屋企係熱熱鬧鬧，覺得咁樣好開心、好歡欣嘅，咁就當然偏心嘅問題會少好多啦，咁就係絕對可以生多個嘅

圖片來源@尋秦記
讀者投稿@細佬