#ParentLicenses2782

守規矩，真係有咁難咩？頭先搭香港快運由曼谷返香港，真係俾隔籬一家人激到眼火爆

話說3+3座位，我坐喺窗口位，隔籬係個阿媽，年紀都唔細，感覺似高齡產婦嗰類。路口位就係佢個女，睇落大概幼稚園年紀。至於個阿爸，就坐喺對面同行路口位

飛機起飛冇幾耐，安全帶燈一熄，個阿媽就即刻拎麥當勞出嚟開餐。阿媽自己食漢堡、飲汽水，個女就薯條加麥樂雞，而個阿爸又一齊食包。成家人好似當咗自己喺美食廣場咁。問題係，空姐明明已經廣播過，又行埋嚟提醒過幾次，講到明唔可以食外來食物

阿媽每次都係用呢兩句回應空姐：「收㗎啦收㗎啦」「而家收緊啦」，人一行開，佢哋又繼續若無其事咁大快朵頤

最諷刺係，連個女都聽到空姐姐姐點講，亦都聽到自己阿媽點樣口頭應承。但原來所謂「收緊」，只不過係做場戲俾人睇。人一走，個女又照樣繼續拎薯條、塞麥樂雞入口。我真係想問家長一句：「你哋平時係點教小朋友？」

重未完。個阿媽喺開餐之前除鞋，將隻着住襪嘅腳抬上張櫈度，唔知點解咁痕，喺度係咁捽小腿，再除咗隻襪喺度捽腳踭。之後，佢繼續用隻手拎嘢食。個女中途嘈，個阿媽就一手掩住個女個嘴，叫佢唔好嘈

個女應該條脷舔咗佢隻手一下，因為個阿媽即刻嫌棄咁話：「你好核突啊！」

講真，成件事荒謬到我都唔知應該嬲定笑。你試下自己幻想下個畫面，油淋淋嘅薯條、麥樂雞、汽水、用嚟捽腳嘅手，再加埋掩過個女個嘴嗰隻手，再用條脷去舐——全部喺同一個空間入面輪流出場，你話係咪已經夠有畫面？

結果去到飛機準備降落、低飛期間，個女就開始話要屙尿屙屎。等到飛機一落地，都未完全停定，個阿媽已經第一時間幫自己同個女解安全帶，即刻坐出路口位。當然，又係要俾人提醒。等到安全帶燈終於熄咗，兩母女就即刻9秒9衝咗去前面，瀟瀟灑灑咁走人

最後得返個阿爸一個喺度執手尾。而所謂「手尾」，就係啲未飲完嘅汽水漏晒落地同埋張櫈度。同個阿爸講，佢係咁意攞張廁紙抹兩嘢張櫈就算數，真係頂唔順

守規矩，真係咁難？你唔守規矩都算，重要搞到其他人受罪，最後留低個爛攤子俾人執。呢啲唔止係冇公德心，直頭係冇品

讀者投稿@桔梗